Nagprotesta ang mga estudyante sang University of Santo Tomas (UST) sadtong Mayo 28-29 batuk sa nagasingki nga pagpangsumpo kag Red-tagging sa sulod sang unibersidad. Ginkundenar nila ang “notice to explain” nga ginpadala sa tatlo ka lider-estudyante sang Kabataan Partylist-UST Artlets nga sanday Raven Racelis, Ray Manuel, kag Kerby Calizar. Ginpasaka ang kaso ni Prof. Marlon Villarin pagkatapos kumprontahon sang mga estudyante ang NTF-Elcac kag AFP sa kampus. Giit sang mga estudyante, lapas sa akademeko nga kahilwayan kag sistematiko nga pagpang-ipit sa mga kritikal nga boses ang reklamo.

Sa Iloilo City, hugot nga ginpamatukan sang mga estudyante sang West Visayas State University ang pag-imbitar kay Lt. Gen. Antonio Nafarrete, kumander sang Philippine Army, bilang bisita nga taghambal sa ila adlaw sang pagkilala sadtong Hunyo 3. Nagsuksok sang itum nga ribon ang mga estudyante sa adlaw nga ini bilang simboliko nga pagpamatuk. Suno sa ila, ang paghatag sang pasidungog sa isa ka opisyal militar nga imbolbado sa mga paglapas sa tawhanon nga kinamatarung insulto sa integridad sang unibersidad.

Sa Davao City, nagprotesta ang mga pamatan-on kag lider-estudyante halin sa UP Mindanao sadtong Hunyo 2 para kundenaron ang Red-tagging sa rehiyon. Kaangot ini sa ginpaguwa sang PNP sa banwa sang Cateel, Davao Oriental nga isa ka “Active Wanted Persons” poster sadtong Mayo 27 kon diin kadam-an sa ginpangalanan mga lider pamatan-on. Ginabutang sa peligro sini ang kabuhi kag seguridad sang 14 ka ginpangalanan kag ila mga pamilya.