Ginsug-alaw sang mga protesta ang pagbisita ni Ferdinand Marcos Jr sa Japan sadtong Mayo 26−28. Tuyo sang 4 ka adlaw nga pagbisita ang pagpabaskog sang mga kasugtanan militar nga Reciprocal Access Agreement kag Acquisition and Cross-Servicing Agreement, pagbakal sang mga daan nga armas kag barko pang-gyera, kag pagbaligya sang barato nga kusog pangabudlay sang mga Pilipino.

Sa Japan, nagpatigayon sang protesta, porum kag photo exhibit ang mga grupo nga Pilipino kag Japanese para kondenaron ang nagalapad nga relasyon militar kag pagbaligya sang armas sa Pilipinas. Ginpangunahan ang mga aktibidad sang Bagong Alyansang Makabayan-Japan, Network Against Arms Trade, kag Japan Campaign for Human Rights in the Philippines. Suno sa ila, ang pagbaligya sang mga armas sa Pilipinas nagasuporta sa lapnagon nga paglapas sang rehimen Marcos sa tawhanon nga kinamatarung.

Plano nga baklon sang rehimen ang mga daan nga barko (Abukuma-class) sang Japan, Type 88 missiles, kag iban pa nga kagamitan militar. Agud pondohan ini, mangutang si Marcos sang ¥64.38 bilyon ($413 milyon) halin sa Japan sa idalum sang Official Development Assistance.

Sa Pilipinas, nagprotesta ang mga progresibo nga grupo malapit sa embahada sang Japan sadtong Mayo 26 agud manawagan sang hustisya para sa mga biktima sang pagpanakop sang Japan sadtong Ikaduha nga Inaway Pangkalibutanon, partikular ang mga krimen batuk sa pag-ulipon nga comfort women. Suno sa ila, ang pagpasugot sang rehimen Marcos nga liwat magtapak sa kadutaan sang Pilipinas ang mga soldado nga Japanese pamatuod sa pagka-sunod-sunoran sini sa padihot nga gyera sang US sa Asia.

Kadungan sa hambalanon militar, ginpahambog ni Marcos ang pangako nga ₱56.3 bilyon nga pangapital halin sa apat ka kumpaniya nga Japanese nga ginalauman nga magatuga sang 10,000 trabaho. Subongman, suno sa Pagkakaisa ng mga Manggagawa sa Timog Katagalugan, wala tubtob san-o nagdulot sang kauswagan ang pangapital nga Japanese. Nakatum-ok ang mga operasyon nga ini sa Pilipinas sa prosesong labor-intensive ukon sobra nga paggamit sang kusog pangabudlay. Nagapabilin nga manubo ang sweldo kag limitado ang benepisyo sang mga mamumugon, samtang ang kita ginasaylo pabalik sa Japan.