Sadtong Mayo 28-30, ginlunsar sang US Coast Guard, bitbit ang mga barko sang Philippine Coast Guard, ang gintawag sini nga “gin-isa nga pagpatrolya” sa Bajo de Masinloc (Scarborough Shoal). Sa pagpatrolya nga ini, “gin-ensayo” sang US ang mga Pilipino sa mga operasyon pasulod, pagrekisa kag pagkumpiskar sang mga barko nga ginakabig nga “kaaway” ukon nagahimo sang krimen sa kadagatan; pagpangbangga, pagpangdakop, kag pagpangrekisa sang mga ini; kag pagpulis sa kadagatan.

Hayagan ini nga pagpasilabot kag pagpanggatong sa mga banggaan kag tensyon sa kadagatan. Lapas man ini sa demanda sang mga Pilipino, ilabina sang mga Pilipino nga mangingisda, nga malinong kag diplomatiko nga resolbahon ang mga kagamo sa dagat sa tunga sang Pilipinas kag China. Imbes nga buhinan ang presensya sang mga pwersang armado sa palibot nga kadagatan sang bahura agud magiit ang kinamatarung sang mga magagmay nga mangingisda nga Pilipino, mas labi sini nga ginhimo nga mabudlay tubtob imposible ang malinong nga pagpalawod kag pagpangisda nila diri.

Ang Bajo de Masinloc sentro sang mainit nga banggaan tungod sa dungan nga pag-angkon diri sang China kag Pilipinas. Sadtong 2016, gindeklarar sang Permanent Court of Arbitration ang kadagatan sa palibot sini bilang tradisyunal nga fishing grounds sang mga magagmay nga mangingisda nga Pilipino, Chinese kag Vietnamese.