Aton ang kinse. Nagprotesta ang mga grupo sang mangingisda sa pagpanguna sang Pamalakaya sa atubang sang Department of Agriculture sa Quezon City sadtong Mayo 28 agud kondenaron ang pagdamo sang komersyal nga pagpangisda sa sulod sang 15 kilometro nga municipal waters nga ginpahanugutan sang desisyon sang Korte Suprema sadtong Disyembre 2024. Ang protesta pagdumdom man sa National Fisherfolk’s Day sadtong Mayo 31.

Manugtinda kontra imperyalistang gyera. Sa Tuguegarao City, ginatos ka manugtinda sa Mall of the Valley ang nagpirma sa petisyon nga nagapanawagan sang gilayon nga pagpauntat sa gyerang agresyon sang US-Israel sa Iran. Kadungan sini ang panawagan para sa pagpanubo sa presyo sang lana kag paghatag sang suporta pinansyal sa mga magagmay nga manugtinda. Suno sa ila, nagsarurot sang halos 60% ang ila kita tungod sa pagsaka sang presyo sang lana.

“Poorest de Mayo” sang mga imol. Ginlunsar sang mga progresibong grupo sa Metro Manila ang tatlo ka separado nga parada nga “Poorest de Mayo” sadtong ulihi nga semana sang Mayo bilang matinugahon nga protesta batuk sa kaimolon. Gikan sa tradisyunal nga Flores De Mayo, suksok sang mga nagpartisipar ang himo sa gin-resaykol nga materyales nga nagalaragway sa mga isyu sang pumuluyo. Lakip diri ang kawad-on sang palangabuhian, manubo nga sweldo, demolisyon, krisis sa edukasyon, pagkaguba sang kapalibutan, kag pag-antus tungod sang mga inaway nga gyera sang US kag Israel sa Middle East.

Imbestigaran ang sunog sa Delpan. Nagpanawagan ang Kadamay sang gilayon nga imbestigasyon sa sunog sa Parola Compound, Delpan, Binondo sa Manila nga nagtuhaw sadtong Mayo 23. Naglab-ot sa 7,123 ka residente ang nawad-an sang puluy-an kag temporaryo nga nagtiner sa mga evacuation center tungod sa sunog. Itukod sa komunidad ang North-South Harbor Bridge Project sang burgesya kumprador nga si Enrique Razon Jr. Kabahin sang proyekto ang isa ka 2.02-kilometro nga taytay nga magasugpon sa Barangay 20 (Parola) sa North Harbor kag Barangay 649 (Baseco) sa South Harbor. Gin-anunsyo ang pagsugod sini sadtong Mayo 22, isa ka adlaw antes ang sunog.

Kambalingan, liwat ginagiit. Sa isa ka porum sadtong Mayo 25, liwat nagpanawagan ang mga bakwit sang Marawi para sa Kambalingan ukon luwas, dungganon, kag matuod nga pagbalik sa ila mga komunidad. Tubtob subong, madamo nga residente ang wala ginpasugtan nga makabalik, samtang ginapatindugan na sang mga proyektong imprastruktura ang ila duta. Ginabatikos sang mga grupo ang paghatag prayoridad sa mga malahalon nga proyekto sang sa sandigan nga serbisyo kag ang mahinay nga proseso sang paghatag sang kumpensasyon. Yara sa 3,187 ukon 22% pa lang ang naproseso halin sa 14,497 ka aplikasyon, nga labi nga nagapaantus sa mga biktima.