Ha Shangri-La Dialogue ha Singapore, nagparayaw hi Gilberto “Gibo” Teodoro Jr, sekretaryo ha depensa han rehimen Marcos, komo tagatanyag han pinakamagraut ngan militarista nga palisiya han imperyalista nga US. Dinhi, gin-aghat niya an mga nasud nga sumunod ha kumpas han US ngan nagpresenta nga magin tagakoordina hini ha Asia. Baga hin tuyaw nga ayam, agresibo niya nga gin-atake an mga naato ha US. Tinuig nga katitirok han mga upisyal ha depensa ha Asia an Shangri-La Dialogue nga ginhimo hadton Mayo 29-31.

Ha katitirok, hul-os nga kahambog nga igindeklara ni Teodoro an Pilipinas komo “Archipelagic Sentinel” ngan “tagdepensa han talwas nga kadagatan.” Subay ini ha estratehiko nga katuyuanan han US nga gamiton komo dako ngan libre nga forward operating base an nasud ha pakigsumpakiay hini ha China. Basaranan hini nga tanyag an National Defense Strategy han US ha pagwawasiwas han panmilitar nga poder nga Amerikano o “peace through strength.” Ginbabaligya ni Teodoro an mga base, pasilidad ngan enklabo han Pilipinas diri la ha US, kundi hasta ha mga sangkay hini, agud gamiton nga lansaran han mga panmilitar nga operasyon, istakan han opensibo nga mga armas, ngan pabrika para ha pan-gerra nga produksyon.

Mahugot nga gindepensahan ni Teodoro an US, hasta na liwat an Japan, kontra ha mga kritisismo han hegemonismo ha Asisa. Gindepensahan niya an militarismo han gubyerno ni Sanae Takaichi ngan an kasaysayan han brutal nga pananakop han Japan ha Asia, kalakip an ha Pilipinas, hadton Ikaduha nga Gerra Mundyal. Gintawag niya nga “diri makatadungan” ngan “sayop nga pagbasa ha kasaysayan” an mga paghinumdom ha mga krimen ha gerra han imperyalista nga Japan. Ha luyo ini han hiluag nga pagtipa han katawhan nga Japanese ha pagbul-iw ha mga probisyon ha konstitusyon ngan balaud nga nagdidiri ha Japan nga madabi ha anuman nga gerra.

Dugang nga iginhigot ni Teodoro an Pilipinas ha estratehiko nga mga interes han US. Ginpirmahan niya, kaupod an sekretaryo han Departnent of War han US nga hi Pete Hegseth, an 15-katuig nga Communications Interoperability and Security Memorandum of Agreement hadton Mayo 30. Ha ilarum han iya pamumuno, duha na nga kasarabutan ha “pagsasaruay han datos paniktik” nga nagbubuksas han mga internal ngan panseguridad nga karukayaknon han Pilipinas ha mga langyaw nga tropa an iya ginpirmahan. Hiya liwat an nagduso ngan nagpirma ha upat nga panmilitar nga kasarabutan nga nagtutugot ha libre nga paggawas-sulod han mga langyaw nga tropa nga alyado han US ha nasud.

Ura-ura nga gindayaw han kriminal ha gerra nga hi Hegseth hi Teodoro nga hul-os nga nasuporta ha karuyag han US nga mag-alutaga an mga nasud ha Asia han tubtub 3.5% han mga gross domestic product o GDP hini (masobra ₱1 katrilyon, kun ha Pilipinas) para ha pandepensa nga kagarastuhan. Para ha 2026, napahitaas na ni Teodoro an badyet han niyutiyo nga AFP han 12% tanding ha 2025 o tikang ₱378.9 kabilyon ngadto ₱423.7 kabilyon. Tungod kay aminado nga diri makakabaton ha rekisito nga badyet, gintanyag han rehimen Marcos an libre nga paggamit ha mga pasilidad, rekurso ngan tuna han mga pwersa nga Amerikano. Sering ni Hegseth, kinahanglan “subaron” han iba an Pilipinas hini nga karukayaknon.

Ha sakob han nasud, nangunguna nga tag-undong han militarista nga doktrina hi Teodoro kontra ha katawhan ngan kagiusan kontra ha imperyalista nga gerra han US, labina ha mga pwersa nga ginpapamunuan han Partido Komunista ng Pilipinas. Sugad han iya amo, iginkokonsidera niya nga “terorismo” an armado nga pag-ato ha imperyalista nga pandambong ngan paniniyupi. Gindadayaw niya an madugo nga kampanya nga kontra-insurhensiya nga nagreresulta ha mga masaker ngan krimen ha gerra. Diri pala maiha, gindayaw ngan nakigselebrar pa hiya ha mga tropa han 79th IB nga aada ha likod han masaker ha 19 nga indibidwal, kaupod an duha nga menor-de-edad, ha Toboso, Negros Occidental. Ura-ura nga natipa liwat hiya ha anuman nga pakikig-erestorya pankamurayawan ha rebolusyunaryo nga kagiusan agud solbaron an gamot han armado nga sumpakiay.

Gintataglawas ni Teodoro an pinakaniyutiyo ngan militarista nga kinaiya han reaksyunaryo nga estado han Pilipino. Syahan hiya nga nagserbe nga sekretaryo ha depensa han korap nga rehimen Arroyo. Antes magin sekretaryo han korap liwat nga rehimen Marcos, nagserbe hiya ha board of directors han langyaw nga kompaniya ha pagmimina nga Sagittarius Mines, Incorporated. Kilalado an kompaniya ha pangangagaw han tuna han mga B’laan para ha Tampakan Copper-Gold Project ngan brutal nga panmuypoy ha ira pag-ato.

Tikang hiya ha pamilya nga Cojuangco, usa nga pamilya han mga berdugo nga agaron maytuna ngan burukrata kapitalista. Nagin kongresista hiya han syahan nga distrito han Tarlac tikang 1998 tubtub 2007. Nag-ambisyon hiya nga magin presidente hadton 2010 kundi napakyas. Hadton 2022, gin-atentar niya nga makig-alyansa kan Sara Duterte agud himuon hiya nga bise presidente hini. Umangkon hiya ni Eduardo “Danding” Cojuangco Jr, prinsipal nga kroni han pasista nga diktadura ni Marcos Sr, sugad liwat han hadto anay presidente nga Corazon Aquino, nga lanong naman ha mga pagmasaker han mga sakada ngan parag-uma.