Pagkatapos sang Balikatan 2026, gilayon nga ginkasa sang US ang masunod na nga mga war games nga Salaknib, Kasangga, kag Marine Exercise (MAREX) sadtong Mayo. Masobra 8,000 ka tropa halin sa US, Japan, Australia, kag Pilipinas, pati na mga tropa halin New Zealand kag Canada, ang nagpakigbahin sa mga war games. Taliw-as sa ginasiling nga para ini sa “eksternal nga depensa,” komon sa tatlo ang mga kontra-insurhensyang operasyon nga ginapatigayon sa mga komunidad sang mga mangunguma kag mangingisda nga Pilipino.

Sa Luzon, ginpatigayon sang US ang Salaknib 2026 nga gintambungan sang mga hukbo pang-duta sang US, Pilipinas, kag New Zealand, kag sang Japan Ground Self-Defense Force. Gina-ensayo sini ang pagsaylo-saylo sang mga gamit-miitar sa tunga sang mga isla nga daw “archipelagic defense.” Nagtutok ang war games sa pag-ensayo sa mga taktika sa inaway sa kagulangan (jungle warfare kag mga small unit tactic) sa mga kondisyon nga “real time.” Gintukod para diri ang mga “jungle combat training center.”

Sa Camarines Sur, ginlunsar ang Kasangga 2026-1 halin Mayo 26 nga ginpakigbahinan sang tropa halin sa Australian Army. Pokus sini ang operasyon paniktik kag kombat sa mga komunidad. Antes pa buksan ang war games, naghugpa na ang dumuluong nga mga tropa sa probinsya. Gingamit nila ang mga baybayon kag bukiron nga bahin sang Pasacao, Balatan, San Fernando, Libmanan, kag Ragay. Ginasulod nila ang mga komunidad kag gin-ipit ang paghulag kag pagtrabaho sang mga mangunguma kag mangingisda.

Sa Mindanao, ginpatigayon sang US ang MAREX 2026 sa Maguindanao del Norte kabulig ang Philippine Marine Corps. Tum-ok sini ang pagpatigayon sang mga jungle patrol sa guwa sang Camp Iranun kag pagpalupok sang artileri malapit sa madamo sang tawo nga lugar sa Datu Blah Sinsuat kag Barira. Nagdulot sang kahangawa sa mga residente ang pagpangkanyon.

Halin pa sang panugod, tum-ok sang mga war games sang US ang kontra-insurhensiya nga mga operasyon. Ang Balikatan, antes ini nangin multilateral nga palagwaon sang mga tropa kag armas, nakatutok sa “internal nga depensa” ukon pag-ekspermento sang mga taktika kag kagamitan batuk sa armadong kahublagan Bangsamoro kag batuk sa Bagong Hukbong Bayan. Ginalunsar sa tabon sini ang mga malaparan nga operasyon sibil-militar kon diin pakitang-tao ang US nga nagatukod sang mga eskwelahan, pagpatigayon sang mga misyon medikal, pagkutkot sang mga bubon kag iban pa nga padihot agud ipahilayo ang “balatyagon kag panghuna-huna” sang pumuluyo sa pagrebolusyon.

Samtang, tum-ok sang Salaknib, nga una nga ginlunsar sadtong 2016, ang pagpauswag sang mga taktika kag ikasarang sang Philippine Army sa jungle warfare, small unit tactics, paggamit sang K-9 (mga ido), pagdis-arma sang mga eksplosibo, kag pagpalupok sang mga kanyon kag mortar. sining nagligad nga duha ka tuig, gin-ekspermento diri ang madamuan nga paggamit sang mga magagmay nga drone (“eye in the sky” sa Cagayan Valley sadtong 2025) kag moderno nga kontra-drone kag electronic warfare (2026), kadungan sa gin-isa nga operasyon sang mga yunit. Ang mga armas nga ginagamit sa mga war games nga ini sa ulihi ginabaligya sang US sa Pilipinas.