Sang nagligad nga semana, saksi ang pumuluyo sa balyahanay kag agaway sang mga burukrata-kapitalista sa pamunuan sang Senado. Sa isa ka bahin ang grupo ni Sen. Tito Sotto, nga nagdeklarar nga “bag-o nga mayoriya” kag may 12 ka senador. Sa pihak nga bahin ang grupo ni Sen. Alan Peter Cayetano nga may 10 ka senador, halin sa sadto 13. Antes sini, napapwesto ni Cayetano ang iya kaugalingon sa kudeta batuk kay Sotto sadtong Mayo 11 sang ginpatuhaw niya si Sen. Ronaldo de la Rosa halin sa 6-bulan nga pagpanago para iboto siya. Sa pagturipad dalagan ni de la Rosa pabalik sa ginapanaguan nga boho, pag-aresto kay Sen. Jinggoy Estrada sa kaso nga pagpangkawkaw kag pagbaliskad ni Sen. Chiz Escudero, nabuhinan ang mayoriya ni Cayetano.

Lutaw sa agaway sa liderato ang pagsala-sala sang mga burukrata-kapitalista nga protektaran ang ila mga kaugalingon kag ila matag-hubon. Yara sa sentro sini ang duso sang kampo ni Cayetano nga ipaatrasar kag lubos nga ibasura ang kaso nga impeachment batuk kay Vice President Sara Duterte. Ginalikawan man sini nga mapalig-on ang report sang Blue Ribbon Committee kon diin ginpangalanan ang pila sa mga senador sa iya kampo nga imbolbado sa mga korapsyon kaangot sa mga proyektong flood control.

Kadungan sini, agresibo nga ginaduso sang kampo ni Cayetano ang mga pag-hearing para tumuron ang papel ni Ferdinand Marcos Jr, pati ang iya mga alyado kag opisyal, bilang yara sa putok-putokan sang mga anomaliya sa flood control. Paiya-iya ang ila pagtinguha para salbaron ang ila mga kaugalingon batuk sa mga kaso nga korapsyon, pagbaton sang suhol, pagpamanggad sa pwesto kag kriminal nga salabton.

Nagatamwa ang duha ka kampo sa eleksyon 2028, kon diin ginasigahum nga maga-kulminar ang banggaanay sang hubon sang mga Duterte nga ginatiglawasan ni Cayetano kag sang mga Marcos, nga ginatiglawasan ni Sotto, kakunsabo ang mga senador sang Liberal Party kag Akbayan.

Sadtong una nga semana sang Hunyo, naglunsar sang serye sang protesta ang mga pungsodnon-demokratikong grupo sa Senado agud kondenaron ang pagpangapin sang mga myembro sini sa mga korap kag kriminal nga opisyal, kag pagsulong sang maka-kaugalingon nga interes. Panawagan nila ang kamatuoran, salabton kag hustisya.