Ginkondenar sang mga grupo pangkapalibutan kag tumandok ang padayon nga pagguba sang kapalibutan agud hatagan ligwa ang mga dalagko nga proyektong imprastruktura kag pagmina.

Sa Laguna, nagmartsa ang mga residente sang Pakil sa pagpanguna sang Mamamayang Nagmamahal sa Pakil sadtong Mayo 30 agud pamatukan ang pagtukod sang Ahunan Dam sa bukid Ping-as. Ginakabig nga sagrado ang bukid kag malahalon nga ginakuhaan sang matinlo nga tubig, irigasyon, kag palangabuhian.

Sa Romblon, napauntat sang protesta sadtong Mayo 25 sang masobra 500 ka residente sang Barangay España kag kaiping nga mga komunidad sa San Fernando, Sibuyan Island ang plano nga pagmina sang Altai Philippines Mining Corporation. Gintuon ang hublag sa sesyon sang Sangguniang Barangay. Target sang operasyon mina ang 1,580 ektarya nga kadutaan sa San Fernando para sa ginabana-bana nga 50,000 tonelada nga nickel ore.

Sa Manila, napilitan ang Department of Environment and Natural Resources kag San Miguel Corporation ni Ramon Ang, nga isuspender ang pag-utod sang mga puno sang kahoy sa kadalanan sang Quirino Avenue pagkatapos sang mga protesta nga ginpangunahan sang Kalikasan People’s Network for the Environment sadtong Mayo 26 kag sang mabaskog nga opinyon publiko. Magalab-ot sa 617 ka puno ang maapektuhan sang Southern Access Link Expressway, kon diin masobra 200 na ang nautod antes ang suspensyon.