Madinalag-on nga ginhiwat sa pagpanguna sang National Democratic Front of the Philippines (NDFP) ang Ika-6 nga Internasyunal nga Teoretikal nga Kumperensya nga may topiko “Pasismo kag Imperyalismo sa mga Neokolonya sa Ika-21 ka siglo” sadtong Mayo 22–23 sa Kathmandu, Nepal. Ginpakigbahinan ini sang halos 200 ka tiglawas halin sa 17 ka pungsod, nga ginabug-os sang mga partido komunista, mga partido sang mamumugon, mga grupo nga nagatukod sang partido, mga rebolusyonaryong organisasyon, mga kahublagan para sa pungsodnon nga kahilwayan, kag mga progresibong organisasyon.

Ang aktibidad ikaduha sa duha ka sunod-sunod nga kumperensya nga nagtalakay sa hambalanon sang pasismo sa ika-21 ka siglo. Ang ginsundan sini nga kumperensya nagtalakay sang pasismo sa mga pusod sang imperyalistang pungsod kag mga industriyalisadong kapitalistang pungsod.

Paagi sa pagtalakay sa 17 ka teoritikal nga papel, ginpadalum sang asembliya ang paghangup sa pasismo bilang produkto sang krisis sang imperyalismo. Ginhatagan tum-ok kon paano ginagamit sang mga imperyalista kag papet nga rehimen ang pasismo paagi sa programang kontra-insurhensya kag lain-lain pa nga dagway sang pagpangsumpo, agud ipabilin ang ila manggad kag gahum.

Nagkuha ang kumperensya sang mga pagtulun-an halin sa mga kontribusyon nanday Lenin, Stalin kag Dimitrov, lakip ang mga pagtulun-an kag ihibalo nga nakalap halin sa ikalima nga teoritikal nga kumperensya sang NDFP,agud maanalisa ang maragtason nga pag-uswag kag pagpasanto sang pasismo sa ika-21 ka siglo sa mga neokolonya nga pungsod. Ginhatagan tum-ok sa kumperensya ang gilayon nga kinahanglanon nga magbug-os sang malapad nga nagahiliugyon nga prente sang mga mamumugon, intelektwal, kag iban pa nga pigos nga sektor agud epektibo nga atubangon kag lutoson ang pasismo.

Gintapos ang kumperensya paagi sa sintesis sang mga talakayan, pagsaludo sa mga martir sang inaway banwa kag mga rebolusyon sa mga neokolonya kag pagkanta sang Internationale.

Ugat sang pasismo sa Pilipinas

Sa artikulo nga ginpaambit sang Komite Sentral sang Partido Komunista sang Pilipinas nga gintig-ulohan “Isulong ang inaway banwa para gabuton ang ugat sang pasismo kag imperyalismo sa mga neokolonya,” ginbaybay ang kasaysayan kag ebolusyon sang pasimo kag neokolonyal nga pasistang estado sa Pilipinas.

Gintuhay sini ang proseso sang pagtuhaw sang pasismo sa mga kapitalistang pungsod kag sa mga neokolonya. Sa mga sentro sang imperyalismo, ang pasismo nagtuhaw bilang reaksyonaryong kahublagan (ultra-nasyunalista kag anti-komunista) nga ginahingalitan ang krisis sang kapitalismo agud agawon ang gahum kag sumpuon ang sahing mamumugon. Sa mga neokolonya, nagtuhaw ang pasismo paagi sa imperyalistang pagpang-ipit sa pungsodnon nga pagpakig-away agud hatagan ligwa ang wala sang upang nga pagpangkawkaw sang mga dumuluong nga kapitalista kag kakunsabo nga lokal nga mga nagahari nga sahi.

Ang pasismo sa Pilipinas indi duna nga nagtuhaw kundi ginpatuman sang imperyalismong US sa dagway sang estadong neokolonyal. Gin-import sang US ang pasismo sa Pilipinas kadungan sang pagpasingki sang krisis sang monopolyo kapitalismo. Samtang ginapabilin ang burges-demokratikong sistema sa kaugalingon nga pungsod, ginapatigayon sini ang brutal nga pasistang pagpangsakop kag kontra-komunista nga pagpangsumpo sa Pilipinas. Sa pagligad sang panahon, mas nga nagsingki ang pagpangsumpo nga ini paagi sa mga doktrinang kontra-insurhensya nga nakabase sa mga manwal sang US.

Halin sa mga nakaligad nga mga papet nga rehimen tubtob sa subong, nagpatuman ang estado sang lain-lain nga kampanyang militar kag mga mapanumpo nga layi kaangay sang Anti-Terror Law kag Executive Order 70 agud sistematiko nga sumpuon ang mga aktibista, mamalitha, kag mga kritiko. Nagagamit man sang mga mekanismo ang estado agud lubos nga maghari, lakip ang pagpatuman sang indi hayagan nga layi militar, pagpatuman sang mga layi agud mangin lehitimo ang pasistang pag-gahum, kontrol sa ideolohiya kag midya, kag paggamit sang abante nga teknolohiya militar para sa pagtiktik kag pagsumpo sa mga rebolusyonaryong kahublagan.

Paagi sa pangmalawigon nga inaway banwa, ginasulong sang Pilipinas ang demokratikong rebolusyon sang banwa agud ibagsak ang paghari sang imperyalismong US kag kakunsabo nga mga nagahari nga sahi. Sa sini lang nga pamaagi matapos ang pasismo.