Sa Shangri-La Dialogue sa Singapore, nagpasikat si Gilberto “Gibo” Teodoro Jr, kalihim sa depensa sa rehimeng Marcos, isip tig-baligya sa labing mangil-ad ug militaristang palisiya sa imperyalistang US. Dinhi, gihagit niya ang mga nasud nga mosunod sa kumpas sa US ug nagpresentar nga mahimong taga-koordina niini sa Asia. Daw iro nga buang, agresibo niyang giatake ang mga mibatok sa US. Ang Shangri-La Dialogue nga gipahigayon niadtong Mayo 29-31 maoy tinuig nga panagtigum sa mga upisyal sa depensa sa Asia.

Sa maong tigum, gipasigarbo ni Teodoro ang Pilipinas isip “Archipelagic Sentinel” ug “tig-panalipod sa gawasnong kadagatan.” Subay kini sa estratehikong laraw sa US nga gamiton ang nasud isip dako ug libreng forward operating base sa ilang panagbangi sa China. Sumpay ang maong tanyag sa National Defense Strategy sa US sa pagbayaw sa Amerikanong gahum militar o “peace through strength.” Ginabaligya ni Teodoro ang mga base, pasilidad ug engklabo sa Pilipinas dili lang sa US, kundi apil na sa mga higala niini, aron gamitong lunsaran sa mga operasyong militar, han-okan sa mga opensibong armas, ug pabrika alang sa produksyong iggubat.

Kusganong gidepensahan ni Teodoro ang US, apil ang Japan, batok sa mga pagsaway sa hegemonismo sa Asia. Gidepensahan niya ang militarismo sa gubyerno ni Sanae Takaichi ug ang kasaysayan sa brutal nga pagpanakop sa Japan sa Asia, lakip na sa Pilipinas, niadtong Ikaduhang Gubat sa Kalibutan. Gitawag niya nga “dili makatarunganon” ug “sayop nga pagbasa sa kasaysayan” ang mga paghinumdom sa mga krimen sa gubat sa imperyalistang Japan. Taliwala kini sa lapad nga pagsupak sa katawhang Japanese sa pagbiya sa mga probisyon sa konstitusyon ug balaod nga nagbawal sa Japan nga moapil-apil sa bisan unsang gubat.

Samot nga gihikot ni Teodoro ang Pilipinas sa estratehikong mga interes sa US. Gipirmahan niya, kauban ang kalihim sa Department of War sa US nga si Pete Hegseth, ang 15-ka-tuig nga Communications Interoperability and Security Memorandum of Agreement niadtong Mayo 30. Sa iyang pagpangulo, duha na ka kasabutan sa “pagpaambitay sa datos paniktik” nga nagbutyag sa mga hisgutanang internal ug seguridad sa Pilipinas ngadto sa mga langyawng tropa ang iyang gipirmahan. Siya usab ang nagduso ug nipirma sa upat ka kasabutang militar nga nagtugot sa gawasnong pagsulod-gawas sa mga langyawng tropa nga kaalyado sa US sa nasud.

Gidayeg sa kriminal sa gubat nga si Hegseth si Teodoro nga hingpit nga nagsuporta sa tinguha sa US nga maggahin ang mga nasud sa Asia og hangtod 3.5% sa ilang gross domestic product o GDP (kapin sa ₱1 trilyon, kung sa Pilipinas) alang sa gastos pandepensa. Alang sa 2026, napasaka na ni Teodoro ang badyet sa itoy nga AFP og 12% itandi sa 2025 o gikan sa ₱378.9 bilyon ngadto sa ₱423.7 bilyon. Tungod kay sayod ang rehimeng Marcos nga dili niini matugyan ang gikinahanglang badyet, gitanyag niini ang libreng paggamit sa mga pasilidad, rekurso ug yuta sa mga pwersang Amerikano. Sumala ni Hegseth, kinahanglang “sundugon” sa uban ang Pilipinas niining hisgutanan.

Sa sulod sa nasud, nag-unang tigpatuman sa militaristang doktrina si Teodoro batok sa katawhan ug kalihukan nga supak sa imperyalistang gubat sa US, ilabi na sa mga pwersang gipangulohan sa Partido Komunista sa Pilipinas. Sama sa iyang amo, gitratar niya nga “terorismo” ang armadong pagsukol batok sa imperyalistang pagpangawkaw ug pagpahimulos. Ginadayeg niya ang duguong kampanyang kontra-insurhensya nga nagresulta sa mga masaker ug krimen sa gubat. Di pa dugay, gidayeg ug nakigsalo pa siya sa mga tropa sa 79th IB nga anaa sa luyo sa masaker sa 19 ka indibidwal, lakip ang duha ka menor-de-edad, sa Toboso, Negros Occidental. Supak usab kaayo siya sa bisan unsang panaghisgot pangkalinaw sa rebolusyonaryong kalihukan aron sulbaron ang gamot sa armadong panagbangi.

Ginarepresentar ni Teodoro ang labing itoy ug militaristang kinaiya sa reaksyunaryong estadong Pilipino. Una siyang nagserbisyo isip kalihim sa depensa sa korap nga rehimeng Arroyo. Sa wala pa mahimong kalihim sa korap usab nga rehimeng Marcos, nagserbisyo siya sa board of directors sa langyawng kompanya sa pagmina nga Sagittarius Mines, Incorporated. Ang kompanya nailhan sa pagpangatake ug pagpang-ilog sa yuta sa mga B’laan alang sa Tampakan Copper-Gold Project ug brutal nga pagsumpo sa ilang pagsukol.

Gikan siya sa pamilyang Cojuangco, usa ka pamilya sa mga bangis nga agalon sa yuta ug burukrata-kapitalista. Nahimo siyang kongresista sa unang distrito sa Tarlac gikan 1998 hangtod 2007. Nag-ambisyon siyang mapili nga presidente niadtong 2010 apan napildi. Niadtong 2022, misulay siya makig-alyansa kang Sara Duterte aron himoon siyang bise-presidente niini. Pag-umangkon siya ni Eduardo “Danding” Cojuangco Jr, nag-unang kroni sa pasistang diktadura ni Marcos Sr, ingon man sa kanhi presidenteng Corazon Aquino, nga ilado sa mga pagmasaker sa mga sakada ug mag-uuma.