Nagprotesta an mga estudyante han University of Santo Tomas (UST) hadyon Mayo 28-29 kontra ha natikagrabe nga panmuypoy ngan Red-tagging ha sakob han unibersidad. Ginkundenar nira an “notice to explain” nga iginpandara ha tulo nga lider-estudyante han Kabataan Partylist-UST Artlets nga hira Raven Racelis, Ray Manuel, ngan Kerby Calizar. Iginsalawad an kaso ni Prof. Marlon Villarin kahuman komprontahon han mga estudyante an NTF-Elcac ngan AFP ha kampus. Pag-insister han mga estudyante, talapas ha akademiko nga katalwasan ngan sistematiko nga pan-gigipit ha mga kritikal nga tingog an araba.

Ha Iloilo City, mahugot nga gintipahan han mga estudyante han West Visayas State University an pag-imbitar kan Lt. Gen. Antonio Nafarrete, kumander han Philippine Army, komo bisita nga tagapagyakan ha ira adlaw han pagkilala hadton Hunyo 3. Nagsul-ot han itom nga ribbon an mga estudyante hiton nga adlaw komo simboliko nga pagtipa. Sering nira, insulto ha integridad han unibersidad an paghatag dungog ha usa nga upisyal militar nga dabi ha mga pagtalapas ha tawhanon nga katungod.

Ha Davao City, nagprotesta an mga kabatan-unan ngan lider-estudyante tikang ha UP Mindanao hadton Hunyo 2 agud kundenahon an Red-tagging ha rehiyon. Kasumpay ini han igin-gawas han PNP ha bungto han Cateel, Davao Oriental nga usa nga “Active Wanted Persons” poster hadton Mayo 27 diin kadam-an ha gin-ngaranan mga lider kabatan-unan. Iginbubutang hini ha kadelikaduhan an kinabuhi ngan seguridad han 14 nga gin-ngaranan ngan ira mga pamilya.