Labaw san-o man ha kasaysayan han Pilipinas, mahugot gud yana an panginahanglan nga makigbisog hin hul-os nga kadasig agud kab-uton an maiha na nga hingyap han katawhan Pilipino nga tinuod nga katalwasan tikang ha bagakolonyal nga kontrol ngan dominasyon han mga imperyalista nga Amerikano.

Ginbabay-og an bug-os nga kalibutan han tikahilarum nga pankalibutan nga krisis han sistema nga kapitalista ngan natikapintas nga sumpakiay han mga imperyalista nga poder. Atubangan hini, dugang nga natikagrabe an panmilitar nga agresyon han US, ha maraut nga larang nga ig-imponer an hegemoniya ha magkalain-lain nga parte han kalibutan para kontrolon an mga surok han hilaw nga materyales ngan mga merkado para ha pagtatambak han iya sobra nga mga epektos.

Ha Pilipinas, mas natikabug-at an pagdat-og han imperyalismo nga US ha katawhan Pilipino. Aada an pirmihan nga presensya ngan hiluagan nga pag-ooperasyon han yukut-yukot nga panmilitar nga pwersa han US ha magkalain-lain nga dapit han nasud, komo butaray nga pagpapakita han ira kontrol ngan dominasyon ha Pilipinas. Waray wantas an pagwawasiwas han US han panmilitar nga pwersa ha porma han susrunod nga pan-gerra nga pagpapahiara. Nagpalupad hadi han Tomahawk missile tikang ha sibilyan nga erport ha Tacloban City ngadto ha Nueva Ecija, nga nagsapeligro ha milyun-milyon nga Pilipino ha Manila ngan iba pa nga lugar nga gin-agian han himubo nga paglupad hini.

Gin-gamit han US an kontrol hini ha Armed Forces of the Philippines (AFP), partikular ha Philippine Navy, hasta ha Philippine Coast Guard, agud magserbe nga escort o bantay ha mga pwersa nga nabal han US nga magmamaniobra ha kadagatan ha palibot han China. Haros permanente nga mayda nakaduong o naglalayag nga higante nga aircraft carrier han US ha kadagatan han Pilipinas. Kalakip dinhi an USS Abraham Lincoln nga linusot ha mga isla han Pilipinas ngadto ha South China Sea antes ini naglayag ha Middle East agud sumuporta ha pag-atake han US ha Iran. Diri pala maiha, “nagpatrulya” an US Coast Guard ha Scarborough Shoal, nga pira kayukot kamilya an distansya ha baybayon han US, agud mangayat ngan manulsol ha China.

Mas mahugot nga ginkokontrol han imperyalismo nga US an niyutiyo nga rehimen Marcos ngan an palisiya nga pan-gawas han nasud. Baga pikoy an mga maka-US nga upisyal han rehimen Marcos ha pauru-utro nga propaganda han US para tagan rason an estratehiya nga “palibutan” ngan “pugngan an paghiluag” han kusog han China. Ginhagudalan liwat han rehimen Marcos an utro nga pagbalik han mga tropa nga Hapon ha Pilipinas agud suportahan an US, nga butaray nga pagtamas-tamas ha guliat han katawhan Pilipino para ha hustisya ha hiluagan nga mga krimen han mga sundalo han Japan han ginsakop an Pilipinas hadton Ikaduha nga Gerra Mundyal.

Ha ekonomiya, mas agresibo nga iginduduso yana han US an pagpapahugot han kontrol han mga kapitalista nga Amerikano ha natural nga karikuhan han nasud, ha balayan han Pax Silica. Igin-iinsister han US an ispesyal nga pagtratar ha mga kompaniya nga Amerikano nga magnenegosyo ha gin-abrihan nga “economic security zone” ha Pampanga ngan Tarlac, para ha pagpoproseso han mga mineral ngan pagtitindog han hakog-ha-tubig nga imprakstraktura para ha artificial intelligence (AI). An mga kompaniya nga Amerikano (hasta na an kasosyo nga panmilitar nga kompaniya han Israel) nga mag-ooperasyon dinhi waray babaydan nga buhis, waray plete ha tuna ngan talwas ha kontrol ngan pagdumara han gubyerno han Pilipinas. Subay ha larang han US, gintatarget ngan iginpapaserra han rehimen Marcos, ha pangunguna han AFP ngan Department of Defense, an mga kompaniya han China nga mayda mga pabrika ha Pilipinas.

Ha militar, natikagrabe an panginginlabot han US ha lokal nga gerra nga panmuypoy ngan pagsungo ha pasismo han reaksyunaryo nga estado kontra ha katawhan nga nakikigbisog. Ha balayan han Salaknib military exercises, ginhihimo an mga pagpapahiara han mga tropa nga Amerikano ha “jungle warfare” ngan “small unit operations” nga nakapokus prinsipal ha mga operasyon nga kontra-gerilya. Gin-armasan hini an AFP han mga jetfighter, helikopter, mga bomba, kanyon, drone, kontra-drone, GPS tracker ngan iba pa nga armas ha desperasyon nga lipulon an BHB, nga usa ha pinakadako nga ulang ha hul-os nga pag-ungbaw han poder han US ha Pilipinas. Dirudiretso nga nasulod an mga tropa nga Amerikano ha mga tay-aw nga lugar ha kabaryuhan, kalakip an ha Central Luzon, Bicol ngan magkalain-lain nga prubinsya ha Mindanao.

Ginsusunghan han imperyalismo nga US an pasista nga panmuypoy han mga armado nga alipures han rehimen Marcos. Nag-iinop hin nagmamata an imperyalismo nga US ngan an mga lurong nga militarista nga upisyal nga mahiaagi ha pasista nga panmuypoy an pagperdi ha armado ngan diri armado nga pag-ato han hiluag nga masa han katawhan nga nakikigbisog para ha tinuod nga katalwasan. An padayon nga pagpupursige ngan madig-on nga pagbawi han kusog han BHB, ngan an natatagamtaman hini nga hiluag nga pagsuporta han masa ha magkalain-lain nga parte han nasud, pagpamatuod nga diri kan-o man mapaparong an hingyap han katawhan Pilipino para ha tinuod nga katalwasan ngan demokrasya.

Haros walo kadekada na tikang hadton Hulyo 4, 1946 han “ighatag” han imperyalismo nga US ha Pilipinas an buwa nga katalwasan, ngan igintukod an niyutiyo ngan pasista nga estado. Kakunsabo an naghahadi nga mga klase han mga dagko nga kumprador burgesya, dagko nga agaron maytuna ngan burukrata kapitalista, iginludlod han imperyalismo nga US an Pilipinas ha bagakolonyal ngan bagapyudal nga kamutangan.

Ha ilarum han 80 katuig nga bagakolonyal nga paghahadi han US, naludlod an Pilipinas ha waray kahumanan nga pan-ekonomiya nga krisis, tungod ha paghihikaw ha Pilipinas han higayon nga tumindog ha kalugaringon nga tiil. Ginpabilin hini an atrasado nga sistema nga pyudal ngan ginpaserbe an nasud nga taga-eksport han barato nga hilaw nga materyales. Gin-gumon an nasud ha langyaw nga pautang para ha temporaryo nga pagpabuylo ha ekonomiya kabalyo han panlugos han mga palisiya nga neoliberal nga nag-upaw ha mga kagugub-an, nagdambong ha mga kabukiran, nanlupot han mga mineral, nag-angkon han gatus-kayukot kaektarya nga katunaan. Gin-gamit an Pilipinas nga dako nga base militar para ig-imponer han US an poder ha nasud ngan magkalain-lain nga parte han kalibutan.

Ha “Adlaw han Katalwasan” ha Hunyo 12, waray pulos nga magselebrar atubangan han paghimakuri han katawhan ngan panraugdaug han langyaw nga panmilitar nga pwersa. Ha 80 katuig nga bagakolonyal nga paghahadi han US, gin-angkon han mga monopolyo kapitalista nga Amerikano an karikuhan han nasud samtang gintalumpigos ngan gin-gutom an hiluag nga masa nga trabahador ngan parag-uma. Kinahanglan tapuson ini nga takna han kasaysayan han nasud nga waray iba nga hingaradtuan kundi dugang pa nga pagkukuri ngan pag-aantos han katawhan. Kinahanglan magkaurusa an bug-os nga katawhan ngan hul-os kadasig nga ipasulong an gerra han katawhan para ha tinuod nga katalwasan, demokrasya ngan katalwasan han nasud.