Aton an Kinse. Nagprotesta an mga grupo han parupangisda ha pangunguna han Pamalakaya ha atubangan han Department of Agriculture ha Quezon City hadton Mayo 28 agud kundenahon an pagdamo han komersyal nga parupangisda ha sakob han 15 kakilometro nga municipal waters nga gintugutan han desisyon han Korte Suprema hadton Disyembre 2024. Paghandum liwat an protesta ha National Fisherfolk’s Day hadton Mayo 31.

Parupaninda kontra imperyalista nga gerra. Ha Tuguegarao City, gatus-gatos nga parupaninda ha Mall of the Valley an nagpirma ha petisyon nga nananawagan han agap nga pagpapaundang ha gerra nga agresyon han US-Israel ha Iran. Kadungan hini an panawagan para ha pagpahimubo ha presyo han lana ngan paghatag han suporta nga pinansyal ha gudti nga parupaninda. Sering nira, binagsak hin haros 60% an ira kita tungod ha paghitaas han presyo han lana.

“Poorest de Mayo” han kablas. Iginlansar han mga progresibo nga grupo ha Metro Manila an tulo nga burublag nga parada nga “Poorest de Mayo” hadton urhi nga semana han Mayo komo mahimuon nga protesta kontra ha kakurian. Tikang ha tradisyunal nga Flores De Mayo, sul-ot han mga nagpartisipar an himo nga ginresaykol nga materyales nga nag-eespiho ha mga isyu han katawhan. Kalakip dinhi an kawaray han pakabuhian, himubo nga suhol, demolisyon, krisis ha edukasyon, paghibang han kalibungan, ngan pagkukuri durot han mga gerra han US ngan Israel ha Middle East.

Imbestigahan an sunog ha Delpan. Nanawagan an Kadamay han agap nga imbestigasyon ha sunog ha Parola Compound, Delpan, Binondo ha Manila nga naglarab hadton Mayo 23. Inabot ha 7,123 nga residente an nawarayan hin urukyan ngan temporaryo nga naukoy ha mga evacuation center tungod ha sunog. Ititindog ha komunidad an North-South Harbor Bridge Project han kumprador burgesya nga hi Enrique Razon Jr. Kaparte han proyekto an usa nga 2.02 kakilometro nga tulay nga magsusumpay ha Barangay 20 (Parola) ha North Harbor ngan Barangay 649 (Baseco) ha South Harbor. Igin-anunsyo an pagtitikang hini hadton Mayo 22, usa kaadlaw antes an sunog.

Kambalingan, utro nga igin-insister. Ha usa nga porum hadton Mayo 25, utro nga nanawagan an mga bakwit han Marawi para ha Kambalingan o talwas, disente, ngan tinuod nga pagbalik ha ira mga komunidad. Tubtub yana, damo nga residente an diri gintutugutan makabalik, samtang gintitindugan na han mga proyekto nga imprastraktura an ira tuna. Ginsusukna han mga grupo an paghatag prayoridad ha marahalon nga proyekto tanding ha batakan nga serbisyo ngan an malangan nga proseso han paghahatag kumpensasyon. Aada ha 3,187 o 22% pa la an naproseso tikang ha 14,497 nga aplikasyon, nga dugang nga nagpapakuri ha mga biktima.