Gintapo han mga protesta an pagbisita ni Ferdinand Marcos Jr ha Japan hadton Mayo 26-28. Tuyo han 4-kaadlaw nga upisyal nga pagbisita an pagpapakusog han mga panmilitar nga kasarabutan nga Reciprocal Access Agreement ngan Acquisition ngan Cross-Servicing Agreement, pagpalit han mga daan nga armas ngan bokis de gerra, ngan pagbaligya han barato nga kusog pagtrabaho han mga Pilipino.

Ha Japan, naghimo han mga protesta, porum, ngan photo exhibit an mga grupo nga Pilipino ngan Japanese agud kundenahon an natikahiluag nga panmilitar nga sumpayan ngan pagbabaligya han armas ha Pilipinas. Ginpangunahan an mga aktibidad han Bagong Alyansang Makabayan-Japan, Network Against Arms Trade, ngan Japan Campaign for Human Rights in the Philippines. Sering nira, an pagbabaligya han mga armas ha Pilipinas nasuporta ha hiluagan nga pagtalapas han rehimen Marcos ha tawhanon nga katungod.

Plano nga paliton han rehimen an mga daan nga barko (Abukuma-class) han Japan, Type 88 missiles, ngan iba pa nga higamit militar. Agud pondohan ini, mangungutang hi Marcos han ¥64.38 kabilyon ($413 kamilyon) tikang ha Japan ha ilarum han Official Development Assistance.

Ha Pilipinas, nagprotesta an mga progresibo nga grupo hirani ha embahada han Japan hadton Mayo 26 agud manawagan han hustisya para ha mga biktima han pananakop han Japan hadton Ikaduha nga Gerra Mundyal, partikular an mga krimen kontra ha mga inuripon nga comfort women. Sering nira, pagpamatuod han pagigin sunud-sunuran hini ha pakana nga gerra han US ha Asia an pagtugot han rehimen Marcos nga utro nga tumamak ha katunaan han Pilipinas an mga sundalo nga Japanese.

Kadungan han panmilitar nga karukayaknon, ginrakudako ni Marcos an saad nga ₱56.3 kabilyon nga pamumuhunan tikang ha upat nga kompaniya nga Japanese nga ginlalauman nga maghihimo han 10,000 nga trabaho. Sugadpaman, sigon ha Pagkakaisa ng mga Manggagawa sa Timog Katalugan, waray bisan san-o nga nagdurot han kauswagan an pamumuhunan nga Japanese. Nakatadong ini nga mga operasyon ha Pilipinas ha proseso nga labor-intensive o marukimot an gamit nga kusog-pagtrabaho. Nagpapabilin nga himubo an suhol ngan limitado an benepisyo han mga trabahador, samtang an kita iginbabalhin pabalik ha Japan.