Kahuman han Balikatan 2026, layon nga iginkasa han US an kasunod nga mga war games nga Salaknib, Kasangga, ngan Marine Exercise (MAREX) hadton Mayo. Masobra 8,000 nga tropa tikang ha US, Japan, Australia, ngan Pilipinas, hasta mga tropa tikang New Zealand ngan Canada, an nagpartisipar ha mga war games. Sukwahi ha ginsesering nga para ini ha “eksternal nga depensa,” komun ha tulo an mga kontra-insurhensiya nga operasyon nga ginhihimo ha mga komunidad han mga parag-uma ngan parupangisda nga Pilipino.

Ha Luzon, ginhimo han US an Salaknib 2026 nga ginpartisiparan han mga army han US, Pilipinas, ngan New Zealand, ngan han Japan Ground Self-Defense Force. Ginpapahiara hini an pagbarubalhin han mga higamit militar ha giutan han mga isla ha kunuhay “archipelagic defense.” Nagpokus an war games ha pagpapahiara ha mga taktika ha gerra ha kagugub-an (jungle warfare) ngan mga small unit tactic ha mga kundisyon nga “real time.” Igintukod para hini an mga “jungle combat training center.”

Ha Camarines Sur, iginlansar an Kasangga 2026-1 tikang Mayo 26 nga ginpartisiparan han mga tropa tikang ha Australian Army. Pokus hini an operasyon nga paniktik ngan kombat ha mga komunidad. Antes pa abrihan an war games, hinugdon na ang langyaw nga mga tropa ha prubinsya. Gin-gamit nira an mga baybayon ngan bubkiron nga parte han Pasacao, Balatan, San Fernando, Libmanan, ngan Ragay. Ginsusulod nira an mga komunidad ngan ginpahugot an gios ngan pagpakabuhi han mga parag-uma ngan parupangisda.

Ha Mindanao, ginhihimo han US an MAREX 2026 ha Maguindano del Norte kabakyang an Philippine Marine Corps. Pokus hini an paghihimo han mga jungle patrol ha gawas han Cam Iranun ngan pagpapabuto han artileri hirani ha tawuhon nga lugar ha Datu Blah Sinsuat ngan Barira. Nagdurot han kasamok ha mga residente an panganganyon.

Tikang ha tinikangan, duon han mga war games han US an kontra-insurhensiya nga mga operasyon. An Balikatan, antes ini magin multilateral nga pasalida han mga tropa ngan armas, nakatadong ha “internal nga depensa” o pag-eeksperimento han mga taktika ngan higamit kontra ha armado nga kagiusan nga Bangsamoro ngan kontra ha Bagong Hukbong Bayan. Iginlansar ha tahub hini an higluag nga sibil-militar nga operasyon diin napakabuotan an US ha pagtitindog han mga eskoylahan, paghihimo han mga medical mission, pag-uukad han mga atabay ngan iba pa nga iskema agud igpahirayo an “kasingkasing ngan hunahuna” han katawhan ha pagrerebolusyon.

Samtang, duon han Salaknib, nga syahan nga iginlansar hadton 2016, an pagpapauswag han mga taktika ngan kapas han Philippine Army ha jungle warfare, small unit tactics, paggamit han K-9 (mga ayam), pagdis-arma han mga eksplosibo, ngan pagpapabuto han mga kanyon ngan mortar. Hini nga naglabay nga duha katuig, gin-eksperimento dinhi an tinagdamo nga paggamit han gudti nga drone (“eye in the sky” ha Cagayan Valley hadton 2025) ngan moderno nga kontra-drone ngan electronic warfare (2026), kadungan han magkatig-ob nga operasyon han mga yunit. An mga armas nga gin-gagamit hini nga mga war games ginbabaligya ha dayuday han US ha Pilipinas.