Naglansar han operasyon nga isnayp an usa nga yunit han Bagong Hukbong Bayan (BHB)-Northern Samar (Rodante Urtal Command) kontra ha mga sundalo han 19th IB nga nakabase ha detatsment ha Barangay Geparayan de Turag, Silvino Lobos, Northern Samar hadton Mayo 22. Pag-imponer han hustisya ha luun-luon nga mga krimen han 19th IB ha masa nga parag-uma an armado nga aksyon.

Maiha na nga gin-aantos han mga residente han Silvino Lobos an panlasurbo han pasista nga militar ha ira komunidad. Kasapit la an nasering nga detatsment han mga kabablayan ngan tungod ha sobra nga kadamo han pasista nga tropa ha kampo nakasalado hira ha mga sibilyan. Niruniyan liwat an mga pankombat nga operasyon nga nagsasamok ha pagpapakabuhi han masa.

Samtang, napatay ha armado nga aksyon han BHB-Northern Negros (Roselyn Jean Pelle Command) an usa nga sundalo han 79th IB nga nag-ooperasyon ha Sityo Cagayon I, Barangay Tamlang, Escalante City, Negros Occidental hadton Hunyo 1. Agap nga nakaglansar han depensa an yunit han hukbo han katawhan kontra ha tikahirani nga tropa ha ira kampo. Tampalong ini ha pauru-utro nga deklarasyon han reaksyunaryo nga estado ngan han armado nga makinarya hini nga waray na nakatindog nga prente gerilya ha erya.

Kahuman han agway, ginpapintas han 79th IB an pankombat nga operasyon ngan militarisasyon ha barangay. Pwersahay nira nga ginpa-ebakwet an 150 kapamilya o 554 nga indibidwal nga temporaryo nga nagkakampo ha Tamlang Elementary School ha sakob han usa kaadlaw.