Ha nakalabay nga mga semana, testigos an katawhan ha agway ngan agaway han mga burukrata kapitalista ha pamunuan han Senado. Ha usa nga gapil an grupo ni Sen. Tito Sotto, nga nagdeklara komo “bag-o nga mayoriya” ngan mayda 12 nga senador. Ha luyo nga gapil an grupo ni Sen. Allan Peter Cayetano nga mayda 10 nga senador, tikang ha daan nga 13. Antes hini, napwesto ni Cayetano an iya kalugaringon ha kudeta kontra kan Sotto hadton Mayo 11 han palutawon niya hi Sen. Ronaldo dela Rosa tikang ha 6-kabulan nga pagtinago agud ibotos hiya. Kahuman han pagkaripas ni dela Rosa tipabalik ha iya gintaguan nga luho, pag-aresto kan Sen. Jinggoy Estrada ha kaso nga pandambong ngan pagbaliskad ni Sen. Chiz Escudero, naibanan an mayoriya ni Cayetano.

Landaw ha agaway ha liderato an kalisang han mga burukrata kapitalista nga protehiran an ira mga kalugaringon ngan kada tagsa nira nga barkadahan. Aada ha sentro hini an pagduso han kampo ni Cayetano nga igdelatar ngan hul-os nga igbasura an kaso nga impeachment kontra kan Vice President Sara Duterte. Ginlilikyan liwat hini nga mapadig-on an report han Blue Ribbon Committee diin gin-ngaranan an pira ha mga senador ha iya kampo nga dabi ha mga korapsyon kasumpay han mga proyekto nga flood control.

Kadungan hini, agresibo nga iginduduso han kampo ni Cayetano an mga pagbista agud tudlukon an papel ni Ferdinand Marcos Jr, hasta han iya mga alyado ngan upisyal, komo aada ha pungkay han mga anomaliya ha flood control. Kada usa ha ira nananalinguha nga isalbar an ira mga kalugaringon kontra ha mga kaso nga korapsyon, pagkarawat han suhol, pagpapariko ha pwesto ngan kriminal nga baratunon.

Nakatan-aw an duha nga kampo ha eleksyon 2028 diin ginlalauman nga mapungkay an banggaay han barkadahan han mga Duterte nga gintataglawas ni Cayetano ngan an kampo han mga Marcos nga gintataglawas ni Sotto, kakunsabo an mga senador han Liberal Party ngan Akbayan.

Hadton syahan nga semana han Hunyo, naglansar han serye han protesta an mga nasyunal demokratiko nga grupo ha Senado agud kundenahon an pagdepensa han mga membro hini ha mga korap ngan kriminal nga upisyal, ngan pagpapasulong han makaiya nga interes. Panawagan nira an kamatuoran, baratunon ngan hustisya.