Madinaugon nga iginlansar ha pangunguna han National Democratic Front of the Philippines (NDFP) an Ika-6 nga Internasyunal nga Teoretikal nga Kumperensya nga mayda tema nga “Pasismo ngan Imperyalismo ha mga Neokolonya ha ika-21 kasiglo” hadton Mayo 22-23 ha Kathmandu, Nepal. Gintambungan ini han haros 200 nga tinaglawas tikang ha 17 nga nasud, nga ginbubug-os han mga partido komunista, mga partido han trabahador, mga grupo nga nagbubug-os han partido, mga rebolusyunaryo nga organisasyon, mga kagiusan para ha nasyunal nga pagtatalwas, ngan mga progresibo nga organisasyon.

Ikaduha an aktibidad ha duha nga magkasunod nga kumperensya nga nagtalakay ha karukayaknon han pasismo ha ika-21 kasiglo. An ginsundan hini nga kumperensya nagtalakay ha pasismo ha mga pusod han imperyalista nga nasud ngan mga industriyalisado nga kapitalista nga nasud.

Pinaagi han pagtalakay ha 17 nga teoretikal nga papel, ginpahilarum han asembleya an pagsantop ha pasismo komo produkto han krisis han imperyalismo. Gintagan duon kun tiunan-o gin-gamit han mga imperyalista ngan niyutiyo nga rehimen an pasismo pinaagi han programa nga kontra-insurhensiya ngan magkalain-lain pa nga porma han panmuypoy, agud igpabilin an ira karikuhan ngan poder.

Kumuha an kumperensya han mga leksyon tikang ha mga kontribusyon nira Lenin, Stalin ngan Dimitrov, kalakip an mga leksyon ngan kahibaruan nga nakuha tikang ha ikalima nga teoretikal nga kumperensya han NDFP, agud maanalisar an makasaysayan nga pag-uswag ngan paghaum han pasismo ha ika-21 kasiglo ha mga neokolonya nga nasud. Gintagan duon ha kumperensya an dagmit nga panginahanglan nga magbug-os han hiluag nga nagkakaurusa nga prente han mga trabahador, intelektwal, ngan iba pa nga tinalumpigos nga sektor agud epektibo nga atubangon ngan perdihon an pasismo.

Ginhuman an kumperensya pinaagi han sinteses han mga diskusyon, papasidungog ha mga martir han gerra han katawhan ngan mga rebolusyon ha mga neokolonya ngan pagkanta han Internationale.

Gamot han pasismo ha Pilipinas

Ha artikulo nga iginpasaro han Komite Sentral han Partido Komunista ng Pilipinas nga gintituluhan nga “Ipasulong an gerra han katawhan para gabuton an gamot han pasismo ngan imperyalismo ha mga neokolonya,” ginbaybay an kasayasayan ngan ebolusyon han pasismo ngan neokolonyal nga pasista nga estado ha Pilipinas.

Ginlain hini an proseso han pagturok han pasismo ha mga kapitalista nga nasud ngan ha mga neokolonya. Ha mga sentro han imperyalismo, an pasismo tinurok komo reaksyunaryo nga kagiusan (ultra-nasyunalista ngan kontra-komunista) nga ginsisingabot an krisis han kapitalismo agud agawon an poder ngan puypuyon an klase nga trabahador. Ha mga neokolonya, linutaw an pasismo pinaagi han imperyalista nga pagpuypoy ha nasyunal nga pag-ato agud ihagudalan an waray-ulang nga pandambong han mga langyaw nga kapitalista ngan kakunsabo nga lokal nga naghahadi nga klase.

An pasismo ha Pilipinas diri natural nga tinurok kundi igin-imponer han imperyalismo nga US ha porma han estado nga neokolonyal. Igin-eksport han US an pasismo ha Pilipinas kadungan han paggrabe han krisis han monopolyo kapitalismo. Samtang ginpapabilin an burges-demokratiko nga sistema ha kalugaringon nga nasud, ginhimo hini an brutal nga pasista nga pagsakop ngan kontra-komunista nga panmuypoy ha Pilipinas. Ha paglabay han panahon, mas naggrabe ini nga panmuypoy pinaagi han mga doktrina nga kontra-insurhensiya nga nakasubay ha mga manwal han US.

Tikang ha mga nakalabay nga niyutiyo nga rehimen tubtub ha presente, nagpatuman an estado han magkalain-lain nga panmilitar nga kampanya ngan mga mapan-gipit nga balaud sugad han Anti-Terror Law ngan Executive Order 70 agud sistematiko nga puypuyon an mga aktibista, mamamahayag, ngan mga kritiko. Nagamit liwat han mga mekanismo an estado agud hul-os nga maghadi, kalakip an pag-iimponer han diri dayag nga balaud militar, pagpapatuman han mga balaud agud magin lehitimo an pasista nga paghahadi, kontrol ha ideolohiya ngan midya, ngan paggamit han abante nga panmilitar nga teknolohiya para ha sarbeylans ngan pagpuypoy ha mga rebolusyunaryo nga kagiusan.

Pinaagi han panmaihaan nga gerra han katawhan, iginpapasulong ha Pilipinas an demokratiko nga rebolusyon han katawhan agud ibagsak an paghahadi han imperyalismo nga US ngan kakunsabo nga mga naghahadi nga klase. Ha sugad hini la nga pamaagi mahuhuman an pasismo.