Nag-anunsyo an Iran hadton Hunyo 1 nga iginsusupendir hini an partisipasyon ha negosasyon ha kamurayawan ha US kasumpay han gerra. Bunga ini han pag-atake ngan panmomba han Zionista nga Israel ha Lebanon nga butaray nga pagtalapas ha balayan para ha ukoy-bubto. Kasumpay hini, utro nga hul-os nga igseserra han Iran an Strait of Hormuz.

Sigon ha Iran, “an pagtalapas ha usa nga natad, pagtalapas ha ukoy-bubto ha ngatanan nga mga natad.” Hadton Mayo 31, igin-anunsiyo mismo han puno nga ministro han Zionista nga Israel nga hi Benjamin Netanyahu nga ginmanduan niya an iya militar agud pahiluagon ngan papintason an mga operasyon ngan maniobra nga militar ha Lebanon. Susrunod an mga panmomba hini nga nagpatay ngan nakasamad ha damo nga sibilyan ha Lebanon.

Kahuman umukoy an negosasyon, gin-atake han US hadton Hunyo 3 an Qeshm Island ha Iran nga ginsesering nga nagruba ha mga misayl ngan drone han nasud. Ginbansagan ini han US komo pitad han “pagdedepensa ha kalugaringon.” Binulos han pag-atake an Iran ha mga base ngan pasilidad han US ha Kuwait ngan Bahrain.

Hadton Mayo 28, luun-luon nga mga bag-o nga sangsyon an igin-imponer han US ha Iran.