Gisugat og mga protesta ang pagbisita ni Ferdinand Marcos Jr sa Japan niadtong Mayo 26−28. Tuyo sa 4-ka-adlaw nga upisyal nga pagbisita ang pagpakusog sa mga kasabutang militar nga Reciprocal Access Agreement ug Acquisition and Cross-Servicing Agreement, pagpalit sa mga karaan nang armas ug barkong iggugubat, ug pagbaligya sa baratong kusog-pamuo sa mga Pilipino.

Sa Japan, nagpahigayon og mga protesta, porum, ug photo exhibit ang mga grupong Pilipino ug Japanese aron kundenahon ang nagalapad nga kalambigitang militar ug pagbaligya og armas sa Pilipinas. Gipangulohan ang mga aktibidad sa Bagong Alyansang Makabayan-Japan, Network Against Arms Trade, ug Japan Campaign for Human Rights in the Philippines. Sumala nila, ang pagbaligya og mga armas sa Pilipinas sumpay sa kaylap nga paglapas sa rehimeng Marcos sa tawhanong katungod.

Plano nga paliton sa rehimen ang mga karaan nang barko (Abukuma-class) sa Japan, Type 88 missiles, ug uban pang himang militar. Aron pondohan kini, mangutang si Marcos og ¥64.38 bilyon ($413 milyon) gikan sa Japan ilawom sa Official Development Assistance.

Sa Pilipinas, nagprotesta ang mga progresibong grupo duol sa embahada sa Japan niadtong Mayo 26 aron manawagan og hustisya para sa mga biktima sa pagsakop sa Japan niadtong Ikaduhang Gubat sa Kalibutan, ilabi na ang mga krimen batok sa mga gihimong ulipon nga comfort women. Matod nila, ang pagtugot sa rehimeng Marcos nga makatunob pag-usab sa yuta sa Pilipinas ang mga sundalong Japanese maoy nagpamatuod nga sunod-sunuran kini sa laraw nga gubat sa US sa Asia.

Dungan sa hisgutanang militar, gipasigarbo ni Marcos ang saad nga ₱56.3 bilyong pamuhunan gikan sa upat ka kumpanyang Japanese nga gilaumang magmugna og 10,000 ka trabaho. Pero sumala sa Pagkakaisa ng mga Manggagawa sa Timog Katagalugan, wala kanus-a man nagdala og kalamboan ang pamuhunang Japanese. Ang mga operasyon niini sa Pilipinas nakasentro sa prosesong labor-intensive o sikit-sikit nga paggamit sa kusog-pamuo. Nagpabiling ubos ang suholan ug limitado ang benepisyo sa mga mamumuo, samtang ang kita gidala pabalik sa Japan.