Niadtong Mayo 28-30, gipahigayon sa US Coast Guard, guyod ang mga barko sa Philippine Coast Guard, ang gitawag niini nga “hiniusang pagpatrulya” sa Bajo de Masinloc (Scarborough Shoal). Niining pagpatrulya, “gibansay” sa US ang mga Pilipino sa mga operasyong pagpasulod, pagrekisa ug pagkumpiska sa mga barkong giisip nga “kaaway” o nagahimo og krimen sa kadagatan; pagbabag, pagsanta, ug pangrikisa niini; ug pagpumulis sa kadagatan.

Dayag kini nga pagpanghilabot ug pagpanghulhog sa mga panagbangi ug tensyon sa kadagatan. Sukwahi usab kini sa hangyo sa mga Pilipino, ilabi na sa mga Pilipinong mangingisda, nga malinawon ug diplomatikong sulbaron ang mga kagubot sa dagat taliwala sa Pilipinas ug China. Imbes nga pakunhuran ang presensya sa mga pwersang armado sa palibot nga kadagatan sa shoal aron iduso ang katungod sa gagmayng mangisdaay nga Pilipino, gihimo pa hinuon niini nga mas lisod hangtod imposible ang malinawong paglawig ug panagat nila didto.

Ang Bajo de Masinloc ang sentro sa panagbangi tungod sa dungan nga pag-angkon niini sa China, Pilipinas ug Taiwan. Niadtong 2016, gideklara sa Permanent Court of Arbitration ang kadagatan sa palibot niini isip tradisyunal nga fishing grounds sa gagmayng mangingisda nga Pilipino, Chinese ug Vietnamese.