Labaw pang nahukasan sa bag-ong reporma sa rehimeg US-Marcos sa general education o GE ang daan nang dunot nga sistema sa Pilipinas. Giduso sa Commission on Higher Education (CHED) ang proposisyon nga Reframed General Education Curriculum Component (RGECC). Tumong niini nga kunhuran ang kinahanglanong kurso sa GE gikan sa kasamtangang 36 ngadto na lang sa 18 ka yunit. Gitarget kining ipailalom sa usa ka “pilot” (eksperimento) nga implementasyon sa akademikong tuig nga 2026-2027, diin pagabawasan ang mga kurso kabahin sa kasaysayan, literatura, ug etika.

Ang GE maoy mga kurso nga naghatag og batakang pundasyon sa kolehiyo sama sa Filipino, literatura, kasaysayan, pilosopiya, ug etika nga giingong makatabang sa paghulma sa kritikal nga kahibalo. Ang RGECC sumpay sa kausaban niadtong 2013 (CHED Memorandum Order No. 20) nga mipakunhod sa mga yunit sa GE gikan sa 42-64 ngadto sa 36 subay sa kumpas sa “globalisasyon,” K-12, ug integrasyon sa ASEAN, nga nagtangtang sa Filipino ug Literatura isip yawe nga mga kurso.

Pagsupak sa mga akademiko ug magtutudlo

Ang sunud-sunod nga mga porum ug aktibidad niadtong Mayo maoy nagtukmod sa CHED nga ianunsyo ang pag-uswag sa eksperimentong pagpatuman sa RGECC niadtong Mayo 13. Una niini, nangalap og pirma alang sa petisyon batok sa RGECC ang maong sektor. Mipirma dinhi ang mga nasudnong artista, propesor, ug magbabalaod.

Sumala sa General Education Movement (GEM), ang pag-uswag usa ka kadaugan sa kolektibong pakigbisog, apan dili kini paigo tungod nagpabilin ang sentral nga problema: ang pagbag-o sa istraktura sa edukasyon subay sa merkado ug neoliberalismo. Tumong sa RGECC nga himuong “andam sa trabaho” ang mga estudyante ug maumol sila isip usa ka ulipon ug pwersa sa pamuo para sa mga langyaw nga korporasyon ug dagkong burgesya komprador, samtang gitangtang ang “makitawhanong” aspeto sa pagkat-on. Usa usab kini ka hulga sa panginabuhian sa gibanabana nga 60,000-90,000 ka mga kontraktwal, partaym, ug dili permanenteng mga magtutudlo nga posibleng mawad-an og trabaho.

Giduso sa GEM ang hingpit nga pagbasura sa RGECC. Nanawagan usab sila alang sa tinuod ug nasudnong pagtuki sa kasamtangang kurikulum sa GE, paghimo og gambalay sa bag-ong kurikulum sa demokratikong pamaagi ug pagdumili sa tanang klase sa pagtangtang sa panarbaho nga moresulta sa rebisyon sa GE.

Oryentasyon sa sistema sa edukasyon

Gihulagway sa rebolusyonaryong grupong Katipunan ng mga Gurong Makabayan (Kaguma) ang reporma isip “labing agresibo” nga pagbag-o sa istraktura sa edukasyon sulod sa gambalay sa neoliberalismo. Samtang giila ang nagkalapad nga kalihukang batok sa reporma, gipahayag sa grupo nga dili angay mahulog ang katawhan sa lit-ag nga ipanawagang “mobalik” sa nangunang katuyoan sa GE.

Ang GE naggikan sa programa sa Great Book sa Columbia University nga gitawag og Contemporary Civilization. Nahimo kining modelo sa GE sa tibuok kalibutan isip tubag sa burgesya sa “barbarismo” nga resulta kuno sa Unang Gubat Pangkalibutan. Gigamit ang GE sa paglaom nga makamugna kini og “mas malinawon, tawhanon ug patas nga katilingban” taliwala sa naglungtad nga mga imperyalistang panagbangi.

Sa kinauyokan, bakikaw ang oryentasyon sa GE sa Pilipinas tungod sa pundasyon ug kasaysayan niini. “Ang bugtong tubag niining grabeng komersyalisado ug pagtuok sa mga korporasyon mao ang usa ka militante ug dili matarog nga kalihukang masa nga nagduso sa edukasyon nga gidisenyo alang sa nasudnong industriyalisasyon ug tinuod nga nasudnong kalingkawasan,” ingon sa grupo.

Nakighiusa ang Kabataang Makabayan (KM) sa pakigbisog batok sa dunot nga sistema sa edukasyon. Matod niini, kinahanglang padayon nga palihukon ang kabatan-onang Pilipino aron batukan ang reporma sa GE nga nagpahimutang sa kabatan-onan sa pagkawalay kahibalo. “Kinahanglang pakigbisogan sa mga kabatan-onan ang edukasyong nag-alagad sa interes sa nasud ug katawhan,” pamahayag sa KM.

Giduso sa Kaguma, KM, ug sa tibuok National Democratic Front of the Philippines ang usa ka nasudnon, siyentipiko, ug pangmasang edukasyon isip alternatibo sa kolonyal, komersyalisado ug pasistang edukasyon sa nasud. Hingpit nga makab-ot ug matuman ang maong klase sa edukasyon sa pagpukan sa kasamtangang alang-alang kolonyal ug alang-alang pyudal nga katilingbang Pilipino pinaagi sa demokratikong rebolusyon sa katawhan.