Atin ang Kinse. Nagprotesta ang mga grupo sa mangingisda sa panguna sa Pamalakaya atubangan sa Department of Agriculture sa Quezon City niadtong Mayo 28 aron kundenahon ang pagdaghan sa komersyal nga panagat sa sulod sa 15-kilometrong municipal waters nga gitugotan sa desisyon sa Korte Suprema niadtong Disyembre 2024. Ang protesta paghinumdom usab sa National Fisherfolk’s Day niadtong Mayo 31.

Manindahay batok imperyalistang gubat. Sa Tuguegarao City, gatusan ka manindahay sa Mall of the Valley ang mipirma sa petisyon nga nagpanawagan sa dinalian nga pagpahunong sa gubat sa agresyon sa US-Israel sa Iran. Dungan niini ang panawagan para sa pagpaubos sa presyo sa lana ug paghatag og suportang pinansyal sa gagmayng manindahay. Matod nila, miusos og halos 60% ang ilang kita tungod sa pagsaka sa presyo sa lana.

“Poorest de Mayo” sa mga kabus. Gilunsad sa mga progresibong grupo sa Metro Manila ang tulo ka managlahing parada nga “Poorest de Mayo” niadtong ulahing semana sa Mayo isip mamugnaong protesta batok sa kalisdanan. Subay sa tradisyunal nga Flores De Mayo, suot sa mga misalmot ang hinimo sa recycled nga materyales nga nagpakita sa mga isyu sa katawhan. Apil niini ang kawalay panginabuhi, ubos nga suholan, demolisyon, krisis sa edukasyon, pagkaguba sa kinaiyahan, ug kalisod dala sa mga gubat sa US ug Israel sa Middle East.

Imbestigahan ang sunog sa Delpan. Nanawagan ang Kadamay og dinalian nga imbestigasyon sa sunog sa Parola Compound, Delpan, Binondo sa Maynila nga miulbo niadtong Mayo 23. Miabot sa 7,123 ka residente ang nawad-an og puy-anan ug temporaryong nagpuyo sa mga evacuation center tungod sa sunog. Maigo sa komunidad ang North-South Harbor Bridge Project sa burgesyang kumprador nga si Enrique Razon Jr. Apil sa proyekto ang usa ka 2.02-kilometrong tulay nga magsumpay sa Barangay 20 (Parola) sa North Harbor ug Barangay 649 (Baseco) sa South Harbor. Gipahibalo ang pagsugod niini niadtong Mayo 22, usa ka adlaw sa wala pa ang sunog.

Kambalingan, subling giduso. Sa usa ka porum niadtong Mayo 25, subling nanawagan ang mga bakwit sa Marawi alang sa Kambalingan o luwas, dungganon, ug tinuod nga pagbalik sa ilang mga komunidad. Hangtod karon, daghang residente ang wala gitugotan nga makabalik, samtang gitukuran na og mga proyektong imprastruktura ang ilang yuta. Gimakmak sa mga grupo ang paghatag og prayoridad sa mahalong proyekto kaysa sa batakang serbisyo ug ang hinay nga proseso sa paghatag og kumpensasyon. Anaa sa 3,187 o 22% pa lang ang naproseso gikan sa 14,497 ka aplikasyon, nga nagpasamot sa kalisod sa mga biktima.