Human ang Balikatan 2026, dali-daling gilunsad sa US ang sunod nga mga war games nga Salaknib, Kasangga, ug Marine Exercise (MAREX) niadtong Mayo. Kapin sa 8,000 ka tropa gikan sa US, Japan, Australia, ug Pilipinas, apil na ang mga tropa gikan sa New Zealand ug Canada, ang misalmot sa mga war games. Sukwahi sa giingong alang kini sa “eksternal nga depensa,” komon sa tulo ang mga kontra-insurhensyang operasyon nga gipahigayon sa mga komunidad sa mga mag-uuma ug mangingisdang Pilipino.

Sa Luzon, gipahigayon sa US ang Salaknib 2026 nga giapilan sa mga armi sa US, Pilipinas, ug New Zealand, ug sa Japan Ground Self-Defense Force. Gi-ensayo niini ang pagbalhin-balhin sa mga himan militar sa mga isla sa kunohay “archipelagic defense.” Nagduso ang war games sa pag-praktis sa mga taktika sa gubat sa kalasangan (jungle warfare ug mga small unit tactic) sa mga kondisyong “real time.” Gitukod para niini ang mga “jungle combat training center.”

Sa Camarines Sur, gilunsad ang Kasangga 2026-1 gikan sa Mayo 26 nga gisalmutan sa mga tropa gikan sa Australian Army. Pokus niini ang operasyong pagpaniid ug kombat sa mga komunidad. Sa wala pa magsugod ang war games, nidunggo na ang mga langyawng tropa sa prubinsya. Gigamit nila ang mga baybayon ug bukirong bahin sa Pasacao, Balatan, San Fernando, Libmanan, ug Ragay. Nisulod sila sa mga komunidad ug gipig-ot ang lihok ug panginabuhi sa mga mag-uuma ug mangingisda.

Sa Mindanao, gipahigayon sa US ang MAREX 2026 sa Maguindanao del Norte kauban ang Philippine Marine Corps. Pokus niini ang pagpahigayon og mga jungle patrol sa gawas sa Camp Iranun ug pagpabuto og artileri duol sa mga dapit nga daghag tawo sa Datu Blah Sinsuat ug Barira. Nagdalag kabalaka sa mga residente ang pagpanganyon.

Sukad pa sa sinugdan, duso na sa mga war games sa US ang kontra-insurhensyang mga operasyon. Ang Balikatan, sa wala pa kini nahimong multilateral nga pasundayag sa mga tropa ug armas, nakatutok sa “internal nga depensa” o pag-eksperimento sa mga taktika ug himan batok sa armadong kalihukang Bangsamoro ug batok sa Bagong Hukbong Bayan. Gilunsad sa takuban niini ang kaylap nga operasyong sibil-militar kung asa nagpakitang-tawo ang US sa pagtukod og mga eskwelahan, pagpahigayon og mga misyong medikal, pagkalot og mga atabay, ug uban pang laraw aron ipalayo ang “kasingkasing ug hunahuna” sa katawhan sa pagrebolusyon.

Samtang, duso sa Salaknib, nga unang gilunsad niadtong 2016, ang pagpalambo sa mga taktika ug katakus sa Philippine Army sa jungle warfare, small unit tactics, paggamit sa K-9 (mga iro), pagdis-arma sa mga eksplosibo, ug pagpabuto sa mga kanyon ug mortar. Niining milabayng duha ka tuig, gieksperimento dinhi ang dinaghang paggamit sa gagmayng drone (“eye in the sky” sa Cagayan Valley niadtong 2025) ug modernong kontra-drone ug electronic warfare (2026), dungan sa hiniusang operasyon sa mga yunit. Ang mga armas nga gigamit niining mga war games ibaligya ra pud dayon sa US ngadto sa Pilipinas.