Naglunsad og operasyong isnayp ang usa ka yunit sa Bagong Hukbong Bayan (BHB)-Northern Samar (Rodante Urtal Command) batok sa mga sundalo sa 19th IB nga nakakampo sa detatsment sa Barangay Geparayan de Turag, Silvino Lobos, Northern Samar niadtong Mayo 22. Ang armadong aksyon pagpahamtang og hustisya sa patong-patong nga mga krimen sa 19th IB ngadto sa masang mag-uuma.

Dugay nang giantos sa mga residente sa Silvino Lobos ang pagpanghasi sa pasistang militar sa ilang komunidad. Ang giingong detatsment tapad lang gyud sa mga kabalayan ug tungod sa sobra kadaghan sa pasistang tropa sa kampo, nasagol na sila sa mga sibilyan. Matag karon ug unya sab ang mga operasyong kombat nga nagsamoksamok sa panginabuhi sa masa.

Samtang, napatay sa armadong aksyon sa BHB-Northern Negros (Roselyn Jean Pelle Command) ang usa ka sundalo sa 79th IB nga nag-operasyon sa Sityo Cagayon I, Barangay Tamlang, Escalante City, Negros Occidental niadtong Hunyo 1. Paspas nga nakapahigayon og depensa ang yunit sa hukbong bayan batok sa nagsaka nga tropa sa ilang kampo. Hapak kini sa sige-sigeng deklarasyon sa reaksyunaryong estado ug sa armadong makinarya niini nga wala nay nagtunhay nga nataran sa erya.

Human sa panagsangka, gipagrabe sa 79th IB ang operasyong kombat ug militarisasyon sa barangay. Pugos nilang gipabakwit ang 150 ka pamilya o 554 ka indibidwal nga temporaryong nagpuyo sa Tamlang Elementary School sulod sa usa ka adlaw.