Sa miaging mga semana, nasaksihan sa katawhan ang panagbangi ug pag-ilogay sa mga burukrata-kapitalista sa pagpangulo sa Senado. Sa usa ka bahin ang grupo ni Sen. Tito Sotto nga mideklara isip “new majority” ug adunay 12 ka mga senador. Sa pikas bahin ang grupo ni Sen. Alan Peter Cayetano nga adunay 10 ka mga senador, gikan sa miaging 13. Una niini, gipusisyon ni ang kaugalingon Cayetano sa usa ka kudeta batok kang Sotto niadtong Mayo 11, dihang iyang gipatumaw si Sen. Bato de la Rosa gikan sa 6 ka buwan nga pagtago aron mobotar kaniya. Human nibalik si de la Rosa sa gitaguang langob, pagkasikop kang Sen. Jinggoy Estrada sa kasong pagpangawkaw, ug pagbalhin og kampo ni Sen. Chiz Escudero, nikunhod ang mayorya ni Cayetano.

Tataw sa ilogay sa pagpamuno ang paningkamot sa mga burukrata-kapitalista nga panalipdan ang ilang mga kaugalingon ug tagsa-tagsa nilang paksyon. Sentral niini mao ang pagduso sa kampo ni Cayetano sa paglangay ug hingpit nga pagbasura sa kasong impeachment batok kang Bise Presidente Sara Duterte. Gilikayan usab niini ang pagpalig-on sa taho sa Blue Ribbon Committe diin pipila ka mga senador sa iyang kampo ang gibutyag nga nalambigit sa korapsyon nga may kalabotan sa mga proyektong flood control.

Sa samang higayon, agresibong giduso sa kampo ni Cayetano ang mga pagdungog aron mapunting ang kalambigitan ni Ferdinand Marcos Jr, ingon man sa iyang mga kaalyado ug upisyal, nga maoy naa sa pungkay sa mga anomalya sa flood control. Iya-iya ang ilang paningkamot nga maluwas ang kaugalingon batok sa mga kaso sa korapsyon, pagdawat og suhol, pagpadato sa posisyon, ug kriminal nga tulubagon.

Naglantaw ang duha ka kampo sa eleksyon sa 2028, diin gilaumang mopungkay ang panagbangi sa grupo sa mga Duterte nga girepresentahan ni Cayetano ug ang kampo ni Marcos, nga girepresentahan ni Sotto, kakunsabo ang mga senador sa Liberal Party ug Akbayan.

Sa unang semana sa Hunyo, naglunsad og sunud-sunod nga mga protesta ang mga nasudnon-demokratikong grupo sa Senado aron kundenahon ang pagpanalipod sa mga myembro niini sa mga korap ug krimnial nga mga upisyal, ug ang pagpasiugda sa kaugalingong interes. Nanawagan sila alang sa kamatuoran, pagpanubag, ug hustisya.