Nagprotesta ang mga estudyante sa University of Santo Tomas (UST) niadtong Mayo 28-29 batok sa nagkagrabing pagpanumpo ug Red-tagging sulod sa unibersidad. Gimakmak nila ang “notice to explain” nga gipadala sa tulo ka lider-estudyante sa Kabataan Partylist-UST Artlets nga silang Raven Racelis, Ray Manuel, ug Kerby Calizar. Gisang-at ang kaso ni Prof. Marlon Villarin human gikumpronta sa mga estudyante ang NTF-Elcac ug AFP sa kampus. Sumala sa mga estudyante, sukwahi sa akademikong kagawasan ug sistematikong pagpanumpo sa mga kritikal nga tingog ang maong reklamo.

Sa Iloilo City, hugot nga gibatukan sa mga estudyante sa West Visayas State University ang pag-imbita kang Lt. Gen. Antonio Nafarrete, kumander sa Philippine Army, isip espesyal nga mamumulong sa ilang adlaw sa graduation niadtong Hunyo 3. Nagsuot sila og itom nga ribon sa maong adlaw isip simbolikong pagsupak. Matud nila, insulto sa integridad sa unibersidad ang paghatag-dungog sa usa ka upisyal militar nga nalambigit sa mga paglapas sa tawhanong katungod.

Sa Davao City, nagprotesta ang mga kabatan-onan ug lider-estudyante gikan sa UP Mindanao niadtong Hunyo 2 aron makmakon ang Red-tagging sa rehiyon. Kalambigit kini sa gipagawas sa PNP sa lungsod sa Cateel, Davao Oriental nga usa ka “Active Wanted Persons” poster niadtong Mayo 27 diin kadaghanan sa gipangalanan mga lider-kabatan-onan. Gibutang niini sa peligro ang kinabuhi ug seguridad sa 14 sa ginganlan ug ang ilang mga pamilya.