Gikondena sa mga grupong pangkinaiyahan ug mga lumad ang padayon nga pagguba sa kinaiyahan aron mahatagag dalan ang dagkong mga proyekto sa imprastraktura ug pagmina.

Sa Laguna, nagmartsa ang mga residente sa Pakil ubos sa pagpanguna sa Mamamayang Nagmamahal sa Pakil niadtong Mayo 30 aron babagan ang pagtukod sa Ahunan Dam sa bukid sa Ping-as. Giila nga sagrado ang maong bukid ug importanteng tinubdan sa limpyo nga tubig, irigasyon, ug panginabuhian.

Sa Romblon, napahunong sa usa ka protesta niadtong Mayo 25 nga gitambongan sa kapin 500 ka residente sa Barangay España ug kasikbit nga mga komunidad sa San Fernando, Sibuyan Island ang plano nga pagmina sa Altai Philippines Mining Corporation. Gitunong ang aktibidad sa sesyon sa Sangguniang Barangay. Target sa operasyon sa minahan ang 1,580 ka ektarya nga yuta sa San Fernando alang sa gibanabana nga 50,000 ka tonelada nga nickel ore.

Sa Manila, napugos ang Department of Environment and Natural Resources (DENR) ug San Miguel Corporation ni Ramon Ang nga isuspendi ang pagpamutol sa mga kahoy sa Quirino Avenue human sa mga protesta nga gipangulohan sa Kalikasan People’s Network for the Environment niadtong Mayo 26 ug kusog nga pagmakmak niini sa publiko. Mokabat sa 617 ka mga kahoy ang maapektuhan sa Southern Access Link Expressway, diin kapin sa 200 na ang naputol sa wala pa ang suspensyon.