Malampuson nga gipahigayon sa pagpangulo sa National Democratic Front of the Philippines (NDFP) ang Ika-6 nga Internasyunal nga Teoretikal nga Kumperensya nga adunay temang “Pasismo ug Imperyalismo sa mga Neokolonya sa Ika-21 siglo” niadtong Mayo 22–23 sa Kathmandu, Nepal. Gisalmotan kini sa halos 200 ka representante gikan sa 17 ka nasud, nga gilangkoban sa mga partido komunista, mga partidong mamumuo, mga pundok nga nagatukod og partido, mga rebolusyonaryong organisasyon, mga kalihukan alang sa nasudnong kagawasan, ug mga progresibong organisasyon.

Ang aktibidad ikaduha sa duha ka sunod-sunod nga kumperensya nga nagtuki sa hisgutanan sa pasismo sa ika-21 siglo. Ang giunhan niining kumperensya naghisgot sa pasismo sa mga sentro sa imperyalistang nasud ug mga industriyalisadong kapitalistang nasud.

Pinaagi sa paghisgot sa 17 ka teoretikal nga papel, gipalawman sa asembliya ang pagsabot sa pasismo isip produkto sa krisis sa imperyalismo. Gihatagan og gibug-aton kung giunsa paggamit sa mga imperyalista ug itoy nga rehimen ang pasismo pinaagi sa programang kontra-insurhensya ug lain-laing porma sa pagpanumpo, aron ipatunhay ang ilang bahandi ug gahum.

Mikutlo ang kumperensya og mga pagtulun-an gikan sa mga kontribusyon nilang Lenin, Stalin ug Dimitrov, lakip ang mga pagtulun-an ug kahibalo nga natigom gikan sa ikalimang teoretikal nga kumperensya sa NDFP, aron tun-an ang makasaysayanong paglambo ug pagpahiangay sa pasismo sa ika-21 siglo sa mga neokolonyang nasud. Gihatagan og gibug-aton sa kumperensya ang dinalian nga panginahanglang magtukod og lapad nga nagkahiusang prente sa mga mamumuo, intelektwal, ug uban pang dinaugdaug nga sektor aron epektibong atubangon ug pildihon ang pasismo.

Gitapos ang kumperensya pinaagi sa sintesis sa mga panaghisgot, paghatag og pasidungog sa mga martir sa gubat sa katawhan ug mga rebolusyon sa mga neokolonya ug pag-awit sa Internationale.

Gamot sa pasismo sa Pilipinas

Sa artikulong gipaambit sa Komite Sentral sa Partido Komunista sa Pilipinas nga giulohan og “Iasdang ang gubat sa katawhan para ibton ang gamot sa pasismo ug imperyalismo sa mga neokolonya,” gisubay ang kasaysayan ug ebolusyon sa pasismo ug neokolonyal nga pasistang estado sa Pilipinas.

Giila niini ang kalainan sa proseso sa pag-usbaw sa pasismo sa mga kapitalistang nasud ug sa mga neokolonya. Sa mga sentro sa imperyalismo, ang pasismo miusbaw isip reaksyunaryong kalihukan (ultra-nasyunalista ug anti-komunista) nga nagpahimulos sa krisis sa kapitalismo aron ilogon ang gahum ug sumpoon ang hut-ong mamumuo. Sa mga neokolonya, mitumaw ang pasismo pinaagi sa imperyalistang pagpanumpo sa nasudnong pagsukol aron hatagag dalan ang walay pugong nga pagpangawkaw sa mga langyawng kapitalista ug kakunsabong lokal nga nagharing hut-ong.

Ang pasismo sa Pilipinas dili natural nga miusbaw kundi gipahamtang sa imperyalismong US sa porma sa estadong neokolonyal. Gi-eksport sa US ang pasismo sa Pilipinas dungan sa pagsamot sa krisis sa monopolyong kapitalismo. Samtang ginapreserba ang burges-demokratikong sistema sa kaugalingong nasud, gihimo niini ang brutal nga pasistang pagsakop ug anti-komunistang pagpamig-ot sa Pilipinas. Sa paglabay sa panahon, labing misamot ang pagpamig-ot pinaagi sa mga doktrinang kontra-insurhensya nga nakabase sa mga manwal sa US.

Sukad sa mga nangaging itoy nga rehimen hangtod sa kasamtangan, nagpatuman ang estado og nagkalain-laing kampanyang militar ug mga mapig-utong balaod sama sa Anti-Terror Law ug Executive Order 70 aron sistematikong sumpoon ang mga aktibista, tig-balita, ug mga kritiko. Gigamit usab sa estado ang mga mekanismo aron hingpit nga maghari, lakip ang pagpahamtang sa dili deklaradong martial law, pagpatuman sa mga balaod aron himoong lehitimo ang pasistang pagdumala, pagkontrol sa ideolohiya ug midya, ug paggamit sa abanteng teknolohiyang militar para sa pagpaniid ug pagsumpo sa mga rebolusyonaryong kalihukan.

Pinaagi sa malungtarong gubat sa katawhan, ginasulong sa Pilipinas ang demokratikong rebolusyon sa katawhan aron pukanon ang paghari sa imperyalismong US ug kakunsabong mga nagharing hut-ong. Sa ingon niini nga paagi lamang mawagtang ang pasismo.