Yukut-yukot nga Pilipino an nagmartsa ngadto ha embahada han US ha Manila hadton Hunyo 12, ika-128 nga anibersaryo han “Adlaw han Katalwasan,” agud suknaon an padayon nga dominasyon han imperyalismo nga US ha nasud. Ha pangunguna han Bagong Alyansang Makabayan (Bayan), ginkundenar nira an buwa nga katalwasan, labina ha atubangan han tikadamo ngan sagunson nga war games, pagtitindog han “Pax Silica hub,” ngan pagbubutang han mga base ngan armas han US ha Pilipinas.

Gatus-gatos nga pulis an tumapo ngan inulang ha mga nagprotesta ha Kalaw Avenue. Ginbarikada ha kalsada an mga alambre nga tunok agud pugngan an martsa, kundi gintanggal ini han mga nagprotesta. Naglansar hira han programa ha lugar kun diin hira ginpugngan han pulis.

Ha Cavite, naghimo han gios protesta ha Kawit ngan Bacoor, diin tulo kabeses gin-atentar nga pugngan han mga pulis an mga raliyista. Ginluho han gintatahapan nga ahente han estado an lidong han mga sarakyan han mga nagprotesta. Nagkamayda liwat han mga paggios ha mga syudad han Cebu, Iloilo, ngan Davao.

Kadungan hini, naglansar han mga protesta an mga Pilipino ha langyaw nga labnasan. Ha New York, pinartisipar ha parada an grupo nga Bayan USA ngan Migrante USA dara an mga panawagan nga hustisya para ha mga caregiver ngan Negros 19. Ha California, nanawagan hira para ha pagpapagawas kan Kuya Richard ha Otay Mesa Detention Center. Nagkamayda liwat han mga paggios ha Australia ngan Hong Kong, diin ginsukna an militarismo han US ngan kawaray han tinuod nga katalwasan ha Pilipinas.