Ginmenos han rebolusyunaryo nga kagiusan ha Southern Tagalog an deklarasyon nga Stable Internal Peace and Security (SIPS) han rehimen Marcos ngan Armed Forces of the Philippines (AFP) ha rehiyon han Calabarzon (Cavite, Laguna, Batangas, Rizal ngan Quezon) hadton Hunyo 12. Deklarasyon ini han AFP nga “murayaw” ngan waray na impluwensya an rebolusyunaryo nga kagiusan ha rehiyon.

Sigon kan Ka Cleo del Mundo, tagapagyakan han Bagong Hukbong Bayas (BHB)-Southern Tagalog (Melito Glor Command), nag-iinop hin nagmamata an rehimen US-Marcos ha deklarasyon hini. “Samtang ginpapagawas nga waray na rebolusyunaryo nga pwersa ha Calabarzon, todo ngan waray hunong naman an mga panmilitar nga operasyon ha magkalain-lain nga parte hini,” sering niya. Padayon kuno an pagsusulukay-sukay han mga pwersa han Southern Luzon Command han AFP ngan 2nd ID ha mga kabukiran ngan kabaryuhan.

Dugang ni del Mundo, an “kamurayawan” nga karuyag han SIPS, para ha mga imperyalista, dagko nga negosyo ngan korporasyon. Labaw hira nga tatagan kalibrihan han rehimen nga dambungon an natural nga karikuhan, palayason an mga parag-uma, pamenuson an suhol han mga trabahador ha uma ngan hikawan han pankatilingban nga serbisyo an katawhan.

Kaparte liwat kuno an deklarasyon han paghalad ha imperyalismo nga US han katangkuran ngan garantiya nga libre na nga gamiton an rehiyon ha gerra nga agresyon ngan iba pa nga pan-ekonomiya nga interes hini. Magigin “libre” na nga igpwesto han mga imperyalista an ira tropa diin man nga parte han rehiyon tungod kay “waray” na an mga “ulang.”

Mayda ini bug-at labina nga an Calabarzon usa ha mga ginlansaran han Balikatan Exercises ngan kaparte han Luzon Economic Corridor nga magseserbe ha ginluluto nga imperyalista nga gerra kontra ha China. Naglalarang pa ini nga magtindog han erport ha Sangley Point, Cavite, nga mayda panmilitar ngan komersyal nga gamit.

Sanglit, sigon kan del Mundo, samtang natikapintas an pananalumpigos ngan paniniyupi magpapadayon an pag-ato han katawhan ngan magpapabilin hira nga nakasarig ha rebolusyunaryo nga kagiusan, nga nakikit-an nira nga komo kaugop ha atubangan hini. “Waray bisan san-o mawara an hukbo han katawhan ha Southern Tagalog. Nakaandam an mga yunit han mga BHB ha ilarum han Melito Glor Command nga magpursige ha armado nga rebolusyon ngan dad-on ini tubtub ha kadaugan,” sering niya.

Komo pagpamatuod han padayon nga pagpupursige han rebolusyunaryo nga kagiusan ha Calabarzon, nagpagawas han kada tagsa nga pahayag an mga yunit han BHB tikang ha Batangas, Rizal ngan Quezon, ngan an National Democratic Front ha Cavite ngan Laguna. Igindeklara nira an determinasyon nga magpupursige ngan maabante labina ha diwa han kagiusan pagtutul-id.