Pagbalhin han prisuhan kan Jovito Palparan, ginkundenar. Kinadto ha Korte Suprema hadton Hunyo 15 hira Erlinda Cadapan ngan Concepcion Empeño, mga iroy han nawawara nga aktibista nga hira Sherlyn Cadapan ngan Karen Empeño, agud ig-insister nga ibuksas an kinamumutangan han hadto anay heneral nga hi Jovito Palparan. Hi Palparan ginsentensyahan hin reclusion perpetua (bug-os nga kinabuhi nga pagkapriso) hin waray parole hadton 2018 ha kaso nga kidnapping ngan serious illegal detention kontra ha duha. Ginkwestyon han mga iroy, kabakyang an Karapatan, an pagkawara ni Palparan tikang ha New Bilibid Prison kahuman igbalik an mga legal notice nga mayda nakasurat nga “transferred to BuCor-Baguio” ngan “PMA Baguio.” Sigon naman ha NBP, aada la kuno hiya ha “ospital.”

Mga parupangisda han Navotas City, utro nga nagprotesta kontra reklamasyon. Utro nga nagprotesta ha Navotas City an mga parupangisda hadton Hunyo 8 komo pagsalin-urog ha World Oceans Day ngan pagkundenar ha mga proyekto nga reklamasyon ha Manila Bay. Prinsipal nga ginsukna han Pamalakaya-Navotas an 650 kaektarya nga Navotas Coastal Bay Reclamation Project nga iginduduso han lokal nga gubyerno ngan Argonbay Construction, subsidyaryo han San Miguel Corporation. Sigon ha grupo, ginbubutang han proyekto an pakabuhian, katungod, ngan kinabuhi han mga residente ha peligro, kalakip an hulga han pagpapalayas, pagbaha, ngan kawakay han kalibungan.

Hustisya para ha namatay nga mga estudyante nga basketbolista han ADMU, iginpapanawagan. Naglansar han walkout an mga estudyante ngan magturutdo han Ateneo de Manila University (ADMU) ha Quezon City hadton Hunyo 19 agud ipanawagan an hustisya ha pagkamatay han duha nga basketbolista nga hira Rene Baterbonia ngan Divine Adili. Namatay an duha kahuman malumos ha Dipaculao, Aurora hadton Hunyo 8 ha butnga han treyning ngan aktibidad han tim ha basketbol. Nananawagan an mga estudyante, magturutdo ngan propesor han ADMU ha administrasyon han unibersidad nga magin tangkod ha publiko, magbaton ha nahitabo, mag-aro han pasaylo ngan tagan hustisya an pamilya han mga biktima. Antes hini, naglansar han programa ngan nagdagkot han kandila an mga progresibo nga grupo ngan estudyante hadton Hunyo 10.

Pagpapagawas kan Mary Jane Veloso, utro nga iginpanawagan. Nagprotesta ha atubangan han Correctional Institute for Women ha Mandaluyong City an magkalain-lain nga grupo, ha pangunguna han Migrante International, hadton Hunyo 19 agud ipanawagan an dagmit nga pagpapagawas kan Mary Jane Veloso. Gindungan an paggios ha paghahatag ni Veloso han pahayag kasumpay han ginsalawad niya nga kaso nga human trafficking, illegal recruitment ngan estafa hadton 2015 kontra ha iya rekruter. Ini an syahan nga higayon nga makapaghahatag hiya han iya testimonya.