Masobra 100 kaadlaw tikang hadton Pebrero 28 han tikangan han imperyalismo nga US ngan Zionista nga estado han Israel an pag-atake ngan pira kasemana nga panmomba ha nasud nga Iran, ginpirmahan han duha nga nasud hadton Hunyo 17 an memorandum of understanding o “kasarabutan” kahuman han tipatip nga negosasyon ha Islamabad, Pakistan. Gin-uunod hini nga kasarabutan an “ceasefire” o ukoy-bubto ha sakob han 60 kaadlaw agud hisgutan an mga detalye han bubug-uson nga pinal nga kasarabutan.

Ini nga kasarabutan ginsulod han US kahuman mapakyas nga paluhuron an Iran agud igsurender an iya lana ngan soberaniya, ngan igpailarum ini ha iya dikta. Ha luyo han mas superyor nga kusog militar ngan pauru-utro nga deklarasyon han kadaugan han tuyaw nga presidente hini, napwersa an US nga temporaryo nga ig-atras an agresyon ha Iran, ha atubangan han hilarum nga pampulitika nga butak ha naghahadi nga klase ha US, ngan makusog nga demanda han mga katawhan ha padayon nga natikahitaas nga presyo han lana.

Pagpamatuod liwat an kasarabutan han kapas han usa nga mas guti ngan mas maluya nga nasud nga mayda soberaniya, nga depensahan an iya paglulugaring kontra ha mas poderoso nga imperyalista. Ha luyo han waray wantas nga panmomba han US ngan Israel, nagpapabilin nga determinado an Iran nga depensahan an iya paglulugaring. Sukwahi ha inop ni Trump ngan Netanyahu nga mag-aalsa an katawhan kontra ha ira gubyerno, nagkaurusa an bug-os nga Iran ha ilarum han bandera han nasyunal nga pandedepensa. Milyun-milyon an nagtirok ha kakalsadahan agud dudrungan nga suknaon an pandadarahug ha ira han imperyalismo nga US.

Bisan kun napirmahan, nagpapabilin nga aada ha peligro an kasarabutan. Padayon an panunulsol ngan pahayag ni Trump nga “mabalik ha gerra” ngan “huhulugan han bomba an ira mga ulo” kun diri makukuha an karuyag ha kasarabutan. Waray pa liwat hunong an panmomba ngan panlupot han Israel ha teritoryo han Lebanon. Nagpapabilin an sumobra kumulang 20 nga base militar hini ha Kuwait, Qatar, Bahrain, United Arab Emirates (UAE), Saudi Arabia, Oman ngan Iraq ha palibot han Iran.

Samtang temporaryo nga ginpreno han US an agresyon ha Iran, padayon naman nga ginpapagrabe an panginginlabot hini ha Latin America. Kahuman atakihon an Venezuela ngan sikmiton an presidente hini nga hi Nicolas Maduro ngan asawa niya nga hi Cilia Flores, waray hunong an pagduduon hini ha gubyerno han Venezuela agud sumunod ha mga dikta han US ngan magserbe ha interes han dagko nga kapitalista nga Amerikano, labina han dagko nga kompaniya han lana.

Gin-gagamit hini an iskema nga “gerra nga kontra narkotiko” agud tagan rason an panginginlabot ngan pananarhug ha Mexico, Colombia, Guatemala ngan iba pa nga nasud. Padayon an panmomba hini ha mga gudti nga sarakyan pandagat ha Caribbean, bisan kun waray ebidensya nga dabi ini ha druga. Padayon an pan-gigipit ngan pananarhug hini ha nasud Cuba para patanggalon an kontrol ngan pagplano han estado ha ekonomiya, ngan abrihan ini ha pagsulod han mga langyaw nga dagko nga bangko ngan kapitalista. Ginsusulsulan hini an gubyerno ha Bolivia nga puypuyon an pira kasemana na nga mga martsa ngan pag-aalsa han milyun-milyon nga anakbalhas kontra ha niyutiyo nga gubyerno ngan plano nga pagsurender han mga rekurso han nasud ha US. Direkta ini nga nanginginlabot agud igdaug an maka-US nga kandidato hini ha Colombia.

Padayon an US ha pagpupwesto han pira kanapulo kayukot nga tropa, mga armas ngan higamit pan-gerra ngan pwersa nga nabal ha Pilipinas, ha Japan, South Korea ngan iba pa nga nasud ha Asia, agud “palibutan” ngan “pugngan an pagkusog” han China. Sige an sulsol ngan suporta ha Japan ha pagbirik ha militarismo ngan pagtalikod ha kontra-gerra nga konstitusyon, nga gintapo han hiluag nga protesta han katawhan. Ginsusulsulan liwat an Taiwan nga magpakusog han militar ngan mangandam “kontra ha agresyon.”

Dirudiretso nga ginpapakusog han US an kontrol ngan dominasyon hini ha Pilipinas. Susrunod ngan sagunson an panmilitar nga pagpapahiara diri la ha norte han Luzon, kundi tubtub ha Visayas ngan Mindanao. Ginhihimo yana han AFP, ha duso han US, an gintatawag nga “territorial defense exercises” nga mga panmilitar nga ehersisyo ha magkalain-lain nga isla, agud tahuban an pagpapahiara han maniobra han mga tropa nga Amerikano ha bug-os nga nasud. Gintitikangan han US nga itindog an istakan han lana (fuel depot) ha Davao Gulf, ngan mga pasilidad ha Cebu ngan Cagayan de Oro para ha pag-ayad o duongan han mga barko nga nabal hini.

Ha tahub han Salaknib Exercises, Kasangga ngan mga kapareho hini, nanginginlabot an militar han US ha mga operasyon nga kontra-gerilya ha nasud, ha porma han pagpapahiara, pagpopondo ngan pag-aarmas ha AFP ha gerra kontra ha Bagong Hukbong Bayan. Ha Camarines Sur, nakit-an an mga tropa nga Amerikano ngan Australian nga kaupod ha mga operasyon han AFP kontra ha masa nga parag-uma ha mga baryo.

Pursigido nga iginduduso han US an pagtitindog ha Central Luzon han 1,200 kaektarya nga “economic security zone” ha balayan han Pax Silica. Kaparte ini han larang han US nga agawon an eksklusibo nga kontrol ha mga prinsipal nga surok han mga importante nga mineral para ha produksyon han teknolohiya nga kinahanglan para ha iya mga armas nga pan-gerra.

Atubangan han nagpapadayon nga panmilitar ngan pan-ekonomiya nga agresyon han imperyalismo nga US, kinahanglan dirudiretso nga pakusgon ngan pahiluagon an pagkakaurusa han katawhan Pilipino, agud ig-insister an soberaniya han nasud ngan tipahan an pagdadanas ha Pilipinas ha mga gerra nga gindadagkutan han US. Kinahanglan suknaon ngan atuhan an niyutiyo nga rehimen Marcos, labina an mga upisyal hini ha militar ngan depensa nga mga ahente han imperyalismo nga US ngan numero uno nga traydor ha nasud. Buta hira nga tagasunod ha mga dikta han amo nga Amerikano ngan kakunsabo ha pag-ungbaw han mga pwersa militar han US ha Pilipinas, ha kahibangan han pakabuhian ngan katalwasan han katawhan, ngan kalibrihan han nasud.

Padayon nga pakusgon an mga panmasa nga pakigbisog kontra ha natikadako nga panmilitar nga presensya han US ha Pilipinas. Pakusgon an kagiusan nga edukasyon, propaganda ngan pankultura agud pukawon an katawhan Pilipino, nga padayon nga ginbubuta ha kamatuoran han paghahadi ngan pananalumpigos han imperyalismo nga US ha nasud. Pahiluagon an mga paggios han katawhan kontra ha mga base ngan panmilitar nga pasilidad han US, mga diri pantay nga panmilitar nga kasarabutan, mga gerra nga pagpapahiara, presensya han mga tropa nga Amerikano, ngan nakaistak nga mga higamit militar han US ha nasud.

Kinahanglan pakusgon an pagrekrut ha Bagong Hukbong Bayan komo nangunguna nga armas han katawhan Pilipino ha pag-ato ha pananalumpigos han imperyalismo nga US ha nasud. Sugad han iginpakita han kasaysayan, an tinuod nga nasyunal nga katalwasan makakab-ot ha dalan han armado nga rebolusyon. Samtang diri tinuod nga nakakaalinggawas an Pilipinas ha dagit han imperyalista nga US, magpapadayon an katawhan Pilipino ha armado nga pag-aalsa agud kab-uton an ginhihingyap nga katalwasan han nasud.