Madinaugon nga nahilansar han grupo ha US nga Freedom Road Socialist Organization (FRSO) an ira ika-10 nga Kongreso hadton Mayo ha kritikal nga panahon nga nauswag an mga pakigbisog han katawhan ngan natikadagmit an pagbagsak ha krisis han monopolyo kapitalismo ha US. Nagpaabot han pagbati ha kongreso han FRSO an Partido Komunista ng Pilipinas (PKP).

An FRSO usa nga nasyunal nga organisasyon han mga rebolusyunaryo nga nakikigbisog para ha sosyalismo ha US. Sigon ha grupo, tikang han ginlansar hini an urhi nga kongreso hadton 2022 nagkamayda han ekstraordinaryo nga paghiluag ngan pagdamo han kaapihan hini ha mga syudad ngan katawhan. Nag-urupod ha kongreso an 185 nga delegado ngan 101 nga alternatibo nga membro hini, nga pinakadamo ha naglabay nga mga kongreso. Nagtikang hira ha ngatanan nga estado han US. Dako nga mayoriya han mga delegado mas bata ha 35 anyos ngan masobra 40% an nagtikang ha tinalumpigos nga nasyunalidad. Haros katunga naman han bug-os nga kongreso mga babaye ngan kaparte han LGBTQ+.

Ha naglabay nga mga tuig, napamunuan han FRSO an pira nga mga protesta nga ginpartisiparan han gatus kayukot nga katawhan ngan hul-os nga nagin usa nga pwersa ha kagiusan masa. Iginreport han grupo an pag-uswag ha mga buruhaton ha kagiusan pagtrabaho, aktibo nga pagbubug-os han mga nasyunal nga kagiusan, ngan pakikig-usa ha mga internasyunal nga pakigbisog sugad han Palestine ngan Pilipinas. Naningkamot liwat an bug-os nga kaapihan hini agud atuhan an reaksyunaryo nga mga atake ni Trump. “Naabante kita ha dalan ngadto ha katuyuanan han pagbug-os han bag-o nga partido komunista nga makapangangayat ha poder,” pahayag han FRSO.

“An iyo katitirok usa nga importante nga kadaugan para ha klase nga trabahador ngan ngatanan nga tiniyupi ngan tinalumpigos nga katawhan ha pusod han imperyalista nga halimaw,” pahayag han PKP. Dugang han Partido, sobra nga napapanahon an kongreso labina ngan dagmit gud nga natikapintas an mga kontradiksyon ha US ngan ha bug-os nga kalibutan.

“Nalantaw kami ha padayon nga duruyog nga pagkahibaro ngan pakigbisog, agud abuton an labaw pa nga mga kadaugan para ha katawhan, ngan para duruyog nga magmartsa ha pagkakab-ot ha katalwasan, hustisya, ngan malamrag nga sosyalista nga kabubwason, ngan mas maranggat pa gud nga komunista nga tidaraon,” sigon ha PKP.