Mga protesta han parag-uma an tumapo hadton Hunyo 10 ha ika-38 katuig han palpak nga Comprehensive Agrarian Reform Program (CARP). Gintawag nira ini nga programa komo “pinakamaiha, pinakamagastos ngan pinakamadugo nga buwa nga reporma ha tuna” nga iginpatuman han reaksyunaryo nga estado.

Ha sakob han upat nga dekada, waray bungkagon han programa an monopolyo ngan kontrol han mga agaron maytuna ngan kapitalista ha higluag nga mga asyenda, plantasyon ngan dagko nga parsela han tuna. Lugod, nagserbe ini nga instrumento han mga langyaw nga kompaniya ngan lokal nga agaron maytuna agud pahiluagon an ira mga plantasyon para ha mga tanum nga pan-eksport, proyekto nga real estate ngan “pankauswagan,” ngan hini nga urhi, mga proyekto para ha renewable energy han mga tuna nga pan-agrikultura.

Ginpagrabe pa ini nga kaayusan han ipatuman han rehimen Marcos an Support to Parcelization of Lands for Individual Titling o SPLIT han World Bank. Katuyuanan hini nga buungon an kolektibo nga pananag-iya han mga asosasyon han parag-uma ha mga parsela han tuna agud himuon nga mas madagmit an pagbaligya han indibidwal nga mga parsela ha mga langyaw nga kompaniya. Igindungan dinhi an gintawag nga “Emancipation Act” para kunuhay ha “pagpapasaylo” ha mga utang han mga parag-uma, para waray na babaydan an mga mapalit.

Samtang iginhihikaw an tuna ha mga parag-uma, ginsisingabot han mga langyaw nga kompaniya ngan agaron maytuna an barato nga kusog-pagtrabaho han milyun-milyon nga parag-uma nga nasulod ha mga diri regular nga mga trabaho agud mabuhi. Ginsusuhulan hira han mas himubo pa ha nasyunal nga minimum, nga hirayo ura-ura ha makaburuhi nga suhol.

Ipasulong an pakigbisog para ha reporma ha tuna

Kabalikskaran ha pagtagad han CARP ha tuna komo epektos, gintatagad ini han rebolusyunaryo nga kagiusan komo katungod han mga nag-uuma. Prinsipal nga demokratiko nga gin-uunod han programa para ha demokratiko nga rebolusyon han katawhan an pagtuman ha hingyap han mga parag-uma nga manag-iya han tuna nga ginhuhulad, ngan an pagpara ha magkalain-lain nga porma han pyudal ngan bagapyudal nga paniniyupi. Ha pagbabag-o gud la han kaayusan ha kabaryuhan mababag-o an bagapyudal nga sistema nga pankatilingban ha Pilipinas.

Subay ha Rebolusyunaryo nga Giya ha Reporma ha Tuna (RGRL) han Partido Komunista ng Pilipinas, nangunguna nga buruhaton han demokratiko nga gubyerno han katawhan nga “makab-ot an hingyap hini pinaagi han pagpapatuman han komprehensibo nga reporma ha tuna.” Aada ha rubas hini an libre nga distribusyon han tuna ha mga kablas ngan ubos tubtub butnga nga parag-uma. Kadungan hini an pagpapasulong han programa para ha bubligay ha produksyon ngan pagpapakusog han pampulitika nga poder han mga parag-uma kontra ha mga naghahadi nga klase ngan ira mga armado nga alipures ha kabaryuhan.

Bisan diri pa nakakab-ot an nasyunal nga kadaugan han demokratiko nga rebolusyon han katawhan, iginpapatuman na han Partido ngan mga rebolusyunaryo nga pwersa an RGRL, partikular na an minimum nga programa hini han pagpapahimubo han plete ha tuna, pagpara ha usura, ngan pagpahitaas ha suhol han mga trabahador ha uma. Iginpapatuman liwat an mga programa para pahitas-on an kita han mga parag-uma ngan iginpapasulong an panawagan para ha pinakamaupay nga presyo han ira mga produkto. Ha balayan han RGRL, iginlalansar an mga kontrapyudal nga pakigbisog para makab-ot an pankatilingban nga hustisya para ha yukut-yukot nga parag-uma ngan pagiuson hira para ha demokratiko nga rebolusyon han katawhan. Ha mismo nga takna han pagbagsak han reaksyunaryo nga estado ngan pagtutukod han demokratiko nga gubyerno han katawhan, igpapatuman an maksimum nga programa han libre nga distribusyon han tuna ha mga parag-uma nga naghuhulad.

Sentro nga buruhaton an pagtutukod ngan pagpapakusog han mga asosasyon han parag-uma ha ilarum han Pambansang Katipunan ng mga Magbubukid (PKM). Ha yana, tukma an panawagan han PKM para pakusgon an mga kontrapyudal nga pakigbisog, pahiluagon an mga panmasa nga asosasyon ha kabaryuhan, bug-uson an yukut-yukot nga grupo nga pan-organisa (OG), ngan marayhak nga ilansar an mga panmasa nga kampanya nga kontrapyudal, kontrapasista ngan kontra-imperyalista. Panawagan liwat hini an pag-aamot han yukut-yukot nga Pula nga mangaraway ha Bagong Hukbong Bayan (BHB).

“Pinakahitaas nga porma han pag-ato han masa nga parag-uma an mismo nga pagkatin han armas,” sering han PKM ha pahayag hini hadton Hunyo 10. Sering hini, ha pagkusog han BHB ha mga prente, ha mga tuna nga mayda imperyalista nga proyekto, ngan mga umhanan nga ginlulupot ngan ginpapalayas an mga parag-uma, papitad-pitad nga marurumok an pampulitika ngan pan-ekonomiya nga poder han niyutiyo nga estado ngan imperyalismo nga US.