Ha naglabay nga mga semana, nahilista an mga pagtalapas ha tawhanon nga katungod kontra ha mga parag-uma, parupangisda ngan kabatan-unan nga estudyante han mga elemento han Armed Forces of the Philippines ngan han lokal nga gubyerno.

Demolisyon. Ginkundenar han Pamalakaya-Cavite an iligal nga pagruba han demolition team han lokal nga gubyerno han Bacoor City ha mga balay han mga parupangisda ha Barangay Talaba 2 hadton Hunyo 15. Waray dara nga dokumento an mga tawuhan, kundi “berbal nga kasuguanan” la. Basar ha dayalogo han grupo kan Meyor Strike Revilla hadton Mayo, kinahanglan tubtub Hulyo pa magpapabilin an mga parupangisda, ngan matatagan an prinsipal nga apektado han fisherman’s dorm o urukyan.

Hadton Hunyo 1, pwersahay nga ginpalayas ngan ginwakay han mga tawuhan han Pieceland Corporation an aada ha 14 nga nasasalin nga balay han mga minoriya nga Mangyan-Iraya ha Sityo Malatabako, Barangay San Vicente, Abra de Ilog, Occidental Mindoro. Nahitabo an insidente kahuman magdesisyon an Abra de Ilog Municipal Trial Court hadton Abril 18 nga salaan ha kaso nga “other forms of trespass” (panginginlabot) an siyam nga minoriya nga Mangyan-Iraya.

Pagsikmit ngan tortyur. Pwersahay nga ginsikmit han mga nakasibilyan nga ahente han 5th ID hi Angel Lopez, konsehal han UP Diliman University Student Council ngan boluntir han Youth Advocates for Climate Action Philippines hadyon Hunyo 13 samtang naghihimo han kampanya ha impormasyon ngan edukasyon ha Barangay Kakiduguen, Kasibu, Nueva Vizcaya. Ha kustodiya han militar, iginpailarum hiya ha sikolohikal ngan emosyunal nga tortyur. Aada hiya ha lugar agud bumulig ha kampanya para ha mga komunidad nga maaapektuhan han operasyon han North Luzon Mineral Resources Corporation. Nagkakampo an 86th IB ha barangay hall han Kakiduguen nga naglalarang nga pugngan an pag-ato han mga residente ha pagmimina ha ira komunidad.

Militarisasyon. Tikang Hunyo 7 tubtub ha presente, nakapailarum ha militarisasyon han 62nd IB an mga komunidad ha Central Negros. Hadton Hunyo 8, iligal nga ginrekisa han militar an mga kabablayan ha mga sityo han Punong, Nabakalan, Anahaw, Tribu, Laos, ngan Agpaptaw nga matatad-an ha bawnderi han mga barangay han Trinidad, Sandayao, ngan Binobohan ha Guihulngan City, Negros Oriental. Samtang, nagkampo naman an pira nga sundalo ha Agogolo Elementary School ha Barangay Macahagnay, Moises Padilla, Negros Occidental nga nagdurot han kahadlok ngan perwisyo ha mga magturutdo ngan estudyante. Grabe liwat nga apektado hini an panginabuhi han mga residente.