Liboan ka mga Pilipino ang nagmartsa paingon sa embahada sa US sa Manila niadtong Hunyo 12, ika-128 nga anibersaryo sa “Adlaw sa Kagawasan,” aron kundenahon ang padayon nga pagdominar sa imperyalismong US sa nasud. Sa pagpanguna sa Bagong Alyansang Makabayan (Bayan), ilang gikundena ang mini nga kagawasan, ilabina atubangan sa nagkadaghan ug nagsapaw-sapaw nga war games, pagtukod sa “Pax Silica hub,” ug ang pagbutang sa mga base ug armas sa US sa Pilipinas.

Gatusan ka mga pulis ang misugat ug mibabag sa mga nagprotesta sa Kalaw Avenue. Gibarikadahan ang kadalanan og mga barbed wire aron pugngan ang martsa, apan gibungkag kini sa mga nagprotesta. Naglunsad sila og programa sa lugar diin gipahunong sila sa kapulisan.

Sa Cavite, naglunsad og lihok protesta sa Kawit ug Bacoor, diin tulo ka higayon nga gisulayan pahunungon sa pulis ang mga raliyista. Gibuslotan sa gidudahang mga ahente sa estado ang mga ligid sa mga sakyanan sa mga nagprotesta. Adunay usab mga kalihukan sa mga dakbayan sa Cebu, Iloilo, ug Davao.

Sa samang higayon, naglunsad og mga protesta ang mga Pilipino sa gawas sa nasud. Sa New York, misalmot sa parada ang grupo sa Bayan USA ug Migrante USA bitbit ang mga panawagan alang sa hustisya sa mga caregiver ug Negros 19. Sa California, nanawagan sila nga buhian si Kuya Richard gikan sa Otay Mesa Detention Center. Aduna sab mga kalihukan sa Australia ug Hong Kong, diin gisaway ang militarismo sa US ug ang kawalay tinuod nga kagawasan sa Pilipinas.