Rinibo a Pilipino ti nagmartsa agturong iti embahada ti US idiay Manila idi Hunyo 12, maika-128 anibersaryo ti “Araw ng Kalayaan,” tapno babalawen ti agtultuloy a dominasyon ti imperyalismo a US iti pagilyan. Iti panangiyuna ti Bagong Alyansang Makabayan (Bayan), kinundenar da ti ubbaw a wayawaya, nangruna iti sango ti umad-ado ken agraragpin a war games, panangitakder ti “Pax Silica hub,” ken panangikabil kadagiti base ken armas ti US iti Pilipinas.

Ginasut a pulis ti simmabat ken nangsaed kadagiti nagprotesta iti Kalaw Avenue. Inbarikada da iti kalsada dagiti barot a siit tapno lapdan ti martsa, ngem inikkat dagitoy dagiti nagprotesta. Nagisayangkat da ti programa iti lugar nu sadinno a pinawilan isuda ti pulis.

Idiay Cavite, naiyaramid ti tignay protesta idiay Kawit ken Bacoor, nu sadinno a tallo a daras a ginandat a lapdan dagiti pulis dagiti raliyista. Linussok ti maatap nga ahente ti estado ti pilid dagiti lugan dagiti nagprotesta. Napasamak met dagiti tignay kadagiti syudad ti Cebu, Iloilo ken Davao.

Kagiddan daytoy, insayangkat dagiti Pilipino iti ballasiw-taaw dagiti protesta. Idiay New York, dimmar-ay iti parada ti grupo a Bayan USA ken Migrante USA nga awit dagiti awag iti hustisya para kadagiti caregiver ken Negros 19. Idiay California, immawag da para iti wayawaya ni Kuya Richard iti Otay Mesa Detention Center. Napasamak met dagiti tignay idiay Australia ken Hong Kong, nu sadinno a nababalaw ti militarismo ti US ken kinaawan ti pudno a wayawaya iti Pilipinas.