Linibo ka Pilipino ang nagmartsa padulong sa embahada sang US sa Manila sadtong Hunyo 12, ika-128 nga anibersaryo sang “Adlaw sang Kahilwayan,” agud batikuson ang padayon nga dominasyon sang imperyalismong US sa pungsod. Sa pagpanguna sang Bagong Alyansang Makabayan (Bayan), ginkundenar nila nag peke nga kahilwayan, ilabina sa atubang sang pagpadamo kag sampaw-sampaw nga war games, pagtukod sang “Pax Silica hub,” kag pagbutang sang mga base kag armas sang US sa Pilipinas.

Ginatos ka pulis ang nagsugata kag nagbalabag sa mga nagprotesta sa Kalaw Avenue. Ginbarikada sa karsada ang mga alambre nga may tunok agud punggan ang martsa, apang ginkakas ini sang mga nagprotesta. Naglunsar sila sang programa sa lugar kon diin sila ginpunggan sang pulis.

Sa Cavite, nagpatigayon sang hublag protesta sa Kawit kag Bacoor, kon diin tatlo ka beses nga gintilawan nga punggan sang mga pulis ang mga raliyista. Ginbuslot sang mga ginasuspetsuhan ahente sang estado ang goma sang mga salakyan sang mga nagprotesta. May mga hublag man sa mga syudad sang Cebu, Iloilo, kag Davao.

Kadungan sini, naglunsar sang mga protesta ang mga Pilipino sa luwas sang pungsod. Sa New York, nagpakigbahin sa parada ang grupo nga Bayan USA kag Migrante USA bitbit ang mga panawagan nga hustisya para sa mga caregiver kag Negros 19. Sa California, nagpanawagan sila para sa paghilway kay Kuya Richard sa Otay Mesa Detention Center. May mga hublag man sa Australia kag Hong Kong, kon diin ginbatikos ang militarismo sang US kag kawad-on sang matuod nga kahilwayan sa Pilipinas.