Pagbalhin sa prisohan kang Jovito Palparan, gikundena. Miadto sa Korte Suprema niadtong Hunyo 15 silang Erlinda Cadapan ug Concepcion Empeño, mga inahan sa nangawalang mga aktibista nga silang Sherlyn Cadapan ug Karen Empeño, aron idemanda ang pagbutyag sa nahimutangan ni kanhi heneral Jovito Palparan. Si Palparan gisentensiyahan og tibuok kinabuhi nga pagkapriso nga walay parol niadtong 2018 sa kasong kidnapping ug serious illegal detention batok sa duha. Gikwestyon sa mga inahan, uban sa Karapatan, ang pagkawala ni Palparan gikan sa New Bilibid Prison human gibalik ang mga legal notice nga gimarkahan og “transferred to BuCor-Baguio” ug “PMA Baguio.” Matud sa NBP, naa ra siya sa “hospital.”

Mga mananagat sa Navotas City, subling nagprotesta kontra reklamasyon. Subling nagprotesta sa Navotas City ang mga mananagat niadtong Hunyo 8 isip paghandom sa World Oceans Day ug pagkundena sa mga proyektong reklamasyon sa Manila Bay. Nangunang gikundena sa Pamalakaya-Navotas ang 650 ka ektarya nga Navotas Coastal Bay Reclamation Project nga giduso sa lokal nga gobyerno ug Argonbay Construction, usa ka subsidyaryo sa San Miguel Corporation. Matud pa sa grupo, gibutang sa peligro sa proyekto ang panginabuhian, katungod, ug kinabuhi sa mga residente, uban ang hulga sa pagpalayas, pagbaha, ug pagkaguba sa kinaiyahan.

Hustisya para sa namatay nga mga estudyanteng basketbolista sa ADMU, gipanawagan. Naglunsad og walkout ang mga estudyante ug magtutudlo sa Ateneo de Manila University (ADMU) sa Quezon City niadtong Hunyo 19 aron ipanawagan ang hustisya sa kamatayon sa duha ka basketbolista nga silang Rene Baterbonia ug Divine Adili. Namatay ang duha human nalumos sa Dipaculao, Aurora niadtong Hunyo 8 taliwala sa treyning ug aktibidad sa tim sa basketbol. Giawhag sa mga estudyante, magtutudlo, ug propesor sa ADMU ang administrasyon sa unibersidad nga magmatinud-anon sa publiko, panubagan ang nahitabo, ug mangayo og pasaylo ug hatagan og hustisya ang mga pamilya sa biktima. Bag-o niini, naglunsad og programa ug nagdagkot og kandila ang mga progresibong grupo ug estudyante niadtong Hunyo 10.

Pagpagawas kang Mary Jane Veloso, subling gipanawagan. Nagprotesta sa atubangan sa Correctional Institute for Women sa Mandaluyong City ang nagkalain-laing grupo, sa pagpanguna sa Migrante International, niadtong Hunyo 19 aron ipanawagan ang hinanaling pagbuhi kang Mary Jane Veloso. Gitunong ang rali sa paghatag ni Veloso og pamahayag kalabot sa gipasaka niyang kaso sa human trafficking, illegal recruitment, ug estafa niadtong 2015 batok sa iyang rekruter. Kini ang unang higayon nga makahatag siya sa iyang testimonya.