Sunudsunod nga taktikal nga opensiba ang gipahigayon sa mga yunit sa Bagong Hukbong Bayan (BHB) sa Negros Island niadtong Hunyo 12 ug 14. Usa ka aktibong depensa usab ang gilunsad sa Northern Samar.

Niadtong Hunyo 14, giambus sa BHB-Northern Negros (Roselyn Jean Pelle Command) ang tropa sa Regional Mobile Force Battalion-Negros Island Region nga nagpahigayon og kontra-insurhensyang operasyon sa Sityo Alimpolosan, Barangay Lalong, Calatrava, Negros Occidental. Gihunong sa mga Pulang manggugubat ang pagpamusil dihang namatikdan nila nga adunay mga sibilyan nga kauban ang mga pulis. Wala na gipadayon sa mga Pulang manggugubat ang pagsulong aron maseguro ang kaluwasan sa mga sibilyan.

Ang giambus nga yunit sa pulis anaa sa erya aron ipadayon ang Retooled Community Support Program (RCSP) nga gisugdan sa 79th IB. Ang RCSP usa ka pagpaaron-ingnong programa ug takuban aron dugang ipagrabe ang militarisasyon sa kabanikanhan.

Niadtong Hunyo 12, nagkaguliyang ang mga sundalo sa 62nd IB sa detatsment sa Barangay Sikatuna, Isabela, Negros Occidental sa gilunsad nga operasyong haras sa BHB-Central Negros (Leonardo Panaligan Command). Usa ka pasistang sundalo ang napatay ug usa ang nasamdan sa maong armadong aksyon.

Sa Northern Samar, naglunsad og armadong aksyon ang BHB-Northern Samar (Rodante Urtal Command) batok sa 20th IB sa Barangay Catotoogan, Las Navas niadtong Hunyo 4 sa hapon. Unang nakapabuto ug aktibong nakadepensa ang Pulang hukbo batok sa nag-operasyong mga sundalo. Unom ka tropa sa 20th IB ang napatay ug daghan pang uban ang nasamdan. Sa ospital, duna pay duha ka sundalo ang namatay.