Kapin 100 ka adlaw gikan Pebrero 28 human gisugdan sa imperyalismong US ug Zionistang estado sa Israel ang pagpangatake ug pipila ka semanang pagpamomba sa nasud sa Iran, nagpirmahay ang duha ka nasud niadtong Hulyo 17 sa usa ka memorandum of understanding o “panagsabot” human ang malisod ug makuti nga negosasyon sa Islamabad, Pakistan. Lakip niining panagsabot ang “ceasefire” o hunong-buto sulod sa 60 ka adlaw aron hisgutan ang mga detalye sa pagahimoong pinal nga kasabutan.

Kining kasabutan gisudlan sa US human napakyas sa pagpaluhod sa Iran aron isurender ang iyang lana ug soberanya, ug ipaubos kini sa iyang mando. Taliwala sa mas labaw nga kusog-militar ug balik-balik nga deklarasyon sa kadaugan sa buang nga presidente niini, napugos ang US nga temporaryong i-atras ang agresyon sa Iran, atubangan sa grabeng panagbangi sa pulitika sa nagharing hut-ong sa US, ug sa kusog nga reklamo sa katawhan tungod sa sige’g saka nga presyo sa lana.

Pagpamatuod usab ang kasabutan sa katakus sa usa ka mas gamay ug mas huyang nga nasud nga adunay soberanya, nga modepensa sa iyang kaugalingnang kagawasan batok sa mas gamhanang imperyalista. Taliwala sa walay hunong nga pagpamomba sa US ug Israel, nagpabiling determinado ang Iran nga panalipdan ang iyang kaugalingon. Sukwahi sa damgo ni Trump ug Netanyahu nga batukan sa katawhan ang ilang gubyerno, nagkahiusa ang tibuok Iran ubos sa bandera sa nasudnong pagdepensa. Minilyon ang nigawas sa kadalanan aron dungan nga sawayon ug batukan ang pagpanghasi kanila sa imperyalismong US.

Bisan napirmahan na, nagpabiling walay kasegurohan ang kasabutan. Sige gihapon ang pagpanghagit ug pamahayag ni Trump nga “mobalik sa gubat” ug “hulogan og bomba ang ilang mga ulo” kung dili makuha ang gusto sa kasabutan. Wala gihapoy hunong ang pagpamomba ug pagpangilog sa Israel sa teritoryo sa Lebanon. Nagpabilin usab ang kapin kun kulang 20 ka base militar niini sa Kuwait, Qatar, Bahrain, United Arab Emirates (UAE), Saudi Arabia, Oman, ug Iraq nga nagpalibot sa Iran.

Samtang temporaryong gipreno sa US ang agresyon sa Iran, padayong gipagrabe ang pagpanghilabot niini sa Latin America. Human gisulong ang Venezuela ug gidagit ang presidente niini nga si Nicolas Maduro ug ang iyang asawa nga si Cilia Flores, walay undang ang pagpamit-os niini sa gubyerno sa Venezuela aron pasundon sa mga mando sa US ug moserbisyo sa interes sa dagkong kapitalistang Amerikano, ilabina sa mga dagkong kumpanya sa lana.

Gigamit niini ang laraw nga “gubat kontra narkotiko” aron ipangatarungan ang pagpanghilabot ug pagpanghulga sa Mexico, Colombia, Guatemala, ug uban pang nasud. Padayon ang pagpamomba niini sa mga gagmayng sakyanan sa dagat sa Caribbean, bisan walay ebidensya nga nalambigit kini sa droga. Padayon ang pagpamit-os ug pagpanghulga niini sa nasud sa Cuba aron gubaon ang kontrol ug pagplano sa estado sa ekonomiya, ug ablihan kini sa pagsulod sa mga langyawng dagkong bangko ug kapitalista. Gihulhog usab niini ang gubyerno sa Bolivia nga puuhon ang pipila ka semana nang mga martsa ug pag-alsa sa minilyong anak-sa-buhat batok sa itoy nga gubyerno ug sa planong pagtugyan sa mga kinaiyahang bahandi sa nasud ngadto sa US. Direkta kining nanghilabot aron padaogon ang pabor sa US nga kandidato sa Colombia.

Padayon ang US sa pagpahimutang sa tinagpulong ka libong tropa, mga hinagiban, kahimanan sa gubat, ug pwersang nabal sa Pilipinas, Japan, South Korea, ug uban pang nasud sa Asia, aron “liyukan” ug “pugngan ang paglambo” sa China. Sige ang hulhog ug suporta niini sa Japan nga mobali sa militarismo ug isalikway ang kontra-gubat nga konstitusyon niini, nga gisugat og lapad nga protesta sa mga katawhan didto. Gisulsolan usab niini ang Taiwan nga magpakusog sa militar ug mangandam “batok sa agresyon.”

Padayon nga gipalig-on sa US ang kontrol ug dominasyon niini sa Pilipinas. Sagonson ug patong-patong ang mga ehersisyong militar dili lang sa amihanang Luzon, kundili abot hangtud sa Visayas ug Mindanao. Ginahimo karon sa AFP, sa duso sa US, ang gitawag nga “territorial defense exercises” nga mga ehersisyong militar sa nagkalain-laing isla, aron tabunan ang pag-ensayo sa maniobra sa mga tropang Amerikano sa tibuok nasud. Gisugdan na sa US ang pagtukod og tipiganan sa lana (fuel depot) sa Davao Gulf, ug mga pasilidad sa Cebu ug Cagayan de Oro para sa pag-ayo o dungguanan sa ilang mga barkong iggugubat.

Sa takuban sa Salaknib Exercises, Kasangga, ug uban pang susama niini, nanghilabot ang militar sa US sa mga operasyong kontra-gerilya sa nasud, pinaagi sa pagbansay, paghatag og puhunan, ug pag-armas sa AFP sa gubat batok sa Bagong Hukbong Bayan (BHB). Sa Camarines Sur, nakit-an ang mga tropang Amerikano ug Australian nga kauban sa mga operasyon sa AFP batok sa masang mag-uuma sa mga baryo.

Todo-todo nga giduso sa US ang pagtukod sa Central Luzon sa usa ka 1,200-hektaryang “economic security zone” sa gambalay sa Pax Silica. Bahin kini sa plano sa US nga ilogon ang eksklusibong kontrol sa mga nag-unang tinubdan sa mga krusyal nga mineral alang sa produksyon sa teknolohiya nga gikinahanglan sa ilang mga himan iggugubat.

Atubangan sa nagpadayong agresyong militar ug pang-ekonomiya sa imperyalismong US, kinahanglang walay undang nga palig-onon ug palapdon ang panaghiusa sa katawhang Pilipino, aron iduso ang kagawasan sa nasud ug batukan ang pagguyod sa Pilipinas sa mga gubat nga giduslitan sa US. Kinahanglang sawayon ug suklan ang itoy nga rehimeng Marcos, ilabina ang mga upisyal niini sa militar ug depensa nga mga ahente sa imperyalismong US ug numero unong maluibon sa nasud. Buta silang tigpatuman sa mga mando sa ilang among Amerikano ug kakuntsaba sa paghari-hari sa mga pwersang militar sa US sa Pilipinas, nga nagdala og katalagman sa panginabuhian ug kaluwasan sa katawhan, ingon man sa kagawasan sa nasud.

Padayon nga pakusgon ang mga pakigbisog sa masa batok sa nagkadakong presensya sa militar sa US sa Pilipinas. Palapdon ang kalihukan sa edukasyon, propaganda, ug pangkultura aron pukawon ang katawhang Pilipino, nga padayong gilingla sa kamatuoran sa paghari ug pagpangdaogdaog sa imperyalismong US sa nasud. Palapdon ang mga lihok-protesta sa katawhan batok sa mga base ug pasilidad militar sa US, mga dili patas nga kasabutang militar, mga pag-ensayo sa gubat, presensya sa mga tropang Amerikano, ug mga nakatago nga himang militar sa US dinhi sa nasud.

Kinahanglang palig-onon ang pagrekrut sa Bagong Hukbong Bayan isip nag-unang hinagiban sa katawhang Pilipino sa pakigbisog sa pagpangdaogdaog sa imperyalismong US sa nasud. Sama sa gipakita sa kasaysayan, ang matuod nga nasudnong kagawasan makab-ot lamang sa dalan sa armadong rebolusyon. Hangtod nga dili hingpit nga makalingkawas ang Pilipinas sa kuko sa imperyalistang US, magpadayon ang katawhang Pilipino sa armadong pag-alsa aron makab-ot ang gihandom nga kagawasan sa nasud.