Mga protesta sa mag-uuma ang misugat niadtong Hunyo 10 sa ika-38 ka tuig sa pakyas nga Comprehensive Agrarian Reform Program (CARP). Gitawag nila ang maong programa nga “pinakadugay, pinakamahal, ug pinamaduguon nga mini nga reporma sa yuta” nga gipatuman sa reaksyunaryong estado.

Sulod sa upat ka dekada, wala gibungkag sa programa ang monopolyong kontrol sa mga agalong yutaan ug kapitalista sa halapad nga mga hasyenda, plantasyon, ug dagkong luna sa yuta. Sukwahi ani, nagsilbi kining instrumento sa mga langyaw nga kompanya ug lokal nga agalong yutaan aron palapdon ang ilang mga plantasyon alang sa mga tanom pang-eksport, proyektong real estate ug “pang-kalambuan,” ug karong bag-o, mga proyekto alang sa renewable energy sa mga yutang pang-agrikultura.

Gipasamot pa ang maong sistema sa dihang gipatuman sa rehimeng Marcos ang Support to Parcelization of Lands for Individual Titling o SPLIT sa World Bank. Tumong niini nga bungkagon ang kolektibong pagpanag-iya sa mga asosasyon sa mga mag-uuma sa mga parsela sa yuta aron himuong mas sayon ang pagbaligya sa tagsa-tagsa ka mga parsela ngadto sa mga langyawng kompanya. Gidungan kini sa gitawag nga “Emancipation Act” aron kuno “pasayluon” ang mga utang sa mga    mag-uuma, aron wala nay bayaran ang mga mopalit.

Samtang gihikaw ang yuta sa mga mag-uuma, gipahimuslan sa mga langyaw nga kompanya ug agalong yutaan ang barato nga kusog-pamuo sa minilyon ka mga mag-uuma nga misulod sa mga dili regular nga trabaho aron mabuhi. Gipangbayran sila og mas ubos pa sa nasudnong minimum, nga layo kaayo sa makabuhing suholan.

Isulong ang pakigbisog alang sa reporma sa yuta

Sukwahi sa pagtratar sa CARP sa yuta isip pamatigayon, gikonsiderar kini sa rebolusyonaryong kalihukan nga katungod sa mga nagtikad. Ang nangunang demokratikong unod sa programa para sa demokratikong rebolusyon sa katawhan mao ang pagpatuman sa tinguha sa mga mag-uuma nga maangkon ang yutang ilang gitikad, ug ang pagwagtang sa nagkalain-laing porma sa pyudal ug semipyudal nga pagpahimulos. Pinaagi lamang sa pag-usab sa sistema sa kabanikanhan mabag-o ang semipyudal nga sistema sa katilingban sa Pilipinas.

Subay sa Rebolusyonaryong Giya sa Reporma sa Yuta (RGRY) sa Partido Komunista sa Pilipinas, ang nangunang tahas sa demokratikong gubyerno sa katawhan mao ang “pagkab-ot sa tumong niini pinaagi sa pagpatuman og komprehensibong reporma sa yuta.” Sa kinauyukan niini naa ang libreng pag-apud-apod sa yuta ngadto sa mga kabus ug ubos ug tunga-tungang mag-uuma. Kauban niini ang pagpasiugda sa programa alang sa pagtinabangay sa produksyon ug pagpalig-on sa pulitikanhong gahom sa mga mag-uuma batok sa mga nagharing hut-ong ug ilang mga armadong pwersa sa kabanikanhan.

Bisan wala pa makab-ot ang nasudnong kadaugan sa demokratikong rebolusyon sa katawhan, gipatuman na ang RGRY sa Partido ug mga rebolusyonaryong pwersa, partikular ang minimum nga programa niini sa pagpaubos sa abang sa yuta, pagwagtang sa usura, ug pagpausbaw sa suholan sa mga mamumuo sa umahan. Gipatuman usab ang mga programa aron mapataas ang kita sa mga mag-uuma ug gipasiugda ang panawagan alang sa pinakamaayo nga presyo sa ilang mga produkto. Sa gambalay sa RGRY, gilunsad ang mga kontra-pyudal nga pakigbisog aron makab-ot ang katilingbanong hustisya para sa minilyon nga mag-uuma ug palihukon sila alang sa demokratikong rebolusyon sa katawhan. Sa mismong takna sa pagkapukan sa reaksyunaryong estado ug sa pagtukod sa demokratikong gubyerno sa katawhan, ipatuman ang maksimum nga program sa libreng pag-apud-apod sa yuta ngadto sa nagtikad nga mag-uuma.

Sentro sa gimbuhaton ang pagtukod ug pagpalig-on sa mga organisasyon sa mga mag-uuma ubos sa Pambansang Katipunan ng mga Magbubukid (PKM). Sa ingon, tukma ang panawagan sa PKM nga palig-unon ang mga kontra-pyudal nga pakigbisog, palapdon ang mga organisasyong masa sa kabanikanhan, tukuron ang libuan ka mga grupong pag-organisa, ug ilunsad og mga kampanyang masa nga kontra-pyudal, kontra-pasista, ug kontra-imperyalista. Panawagan usab niini ang pagtampo sa libuan ka mga Pulang manggugubat sa Bagong Hukbong Bayan (BHB).

“Ang pinakataas nga porma sa pakigbisog sa masang mag-uuma mao ang pagkupot og armas,” matud sa PKM sa pamahayag niini niadtong Hunyo 10. Dugang pa niini, sa pagkusog sa BHB sa mga larangan, sa mga kayutaan nga adunay mga imperyalistang proyekto, ug mga umahan diin giilugan ug gipangpalayas ang mga mag-uuma, hinay-hinay nga madugmok ang politikanhon ug ekonomikanhong gahum sa pahoy nga estado ug sa imperyalismong US.