Gibiaybiay sa rebolusyonaryong kalihukan sa Southern Tagalog ang deklarasyong Stable Internal Peace and Security (SIPS) sa rehimeng Marcos ug Armed Forces of the Philippines (AFP) sa rehiyong Calabarzon (Cavite, Laguna, Batangas, Rizal, ug Quezon) niadtong Hunyo 12. Deklarasyon sa AFP nga “malinawon” na ug wala na’y impluwensya ang rebolusyonaryong kalihukan sa maong rehiyon.

Matud pa ni Ka Cleo del Mundo, tigpamaba sa Bagong Hukbong Bayan (BHB)-Southern Tagalog (Melito Glor Command), nagdamgo lang samtang nagmata ang rehimeng US-Marcos niining deklarasyon. “Samtang nagpakaaron-ingnon sila nga wala na’y rebolusyonaryong pwersa sa Calabarzon, todo-todo ug walay hunong ang mga operasyong militar sa nagkalain-laing bahin niini,” matud niya. Sumala niya, padayon ang pagpanghasi ug pagpang-atake sa mga pwersa sa Southern Luzon Command sa AFP ug 2nd ID sa mga bukid ug kabanikanhan.

Dugang ni del Mundo, ang “kalinaw” nga gusto sa SIPS alang ra sa mga imperyalista, dagkong negosyo, ug korporasyon. Mas gihatagan sila og kagawasan sa rehimen nga kawkawon ang mga kinaiyahang bahandi, palayason ang mga mag-uuma, baraton ang suholan sa mga mamumuo sa umahan, ug hikawan og mga katilingbanong serbisyo ang katawhan.

Kabahin sab sa deklarasyon sa paghalad sa imperyalismong US sa ilang pagkamatinud-anon ug garantiya nga gawasnon niining magamit ang rehiyon para sa gubat sa agresyon ug uban pang interes niini sa ekonomiya. Mahimo nang “gawasnon” ang mga imperyalista sa pagpahimutang sa mga tropa niini sa bisan asang suok sa rehiyon tungod kay “wala” na ang mga “babag.”

Aduna kini’y gibug-aton ilabina nga ang Calabarzon usa sa mga gihimong lunsaranan sa Balikatan Exercises ug kabahin sa Luzon Economic Corridor nga magsilbi sa ginaluto nga imperyalistang gubat batok sa China. Nagplano pa gani kini nga magtukod og tugpahanan sa Sangley Point, Cavite, nga gamiton alang sa militar ug komersyal nga katuyoan.

Mao nga, matud ni del Mundo, samtang nagkagrabe ang pagpangdaogdaog ug pagpahimulos, magpadayon gihapon ang pagsukol sa katawhan ug magpabilin silang nagsalig sa rebolusyonaryong kalihukan, nga ilang nakita nga mao ray bugtong katimbang atubangan niining kahimtang. “Bisan kanus-a, wala nawala ang hukbong bayan sa Southern Tagalog. Andam ang mga yunit sa BHB sa ubos sa Melito Glor Command nga mopadayon ug mopursigi sa armadong rebolusyon ug dad-on kini hangtud sa kalampusan,” matud niya.

Isip pagpamatuod sa padayong pagpaningkamot ug paglahutay sa rebolusyonaryong kalihukan sa Calabarzon, nagpagawas og iyaiyang pamahayag ang mga yunit sa BHB gikan sa Batangas, Rizal, ug Quezon, ug ang National Democratic Front sa Cavite ug Laguna. Ilang gideklara ang hukum nga molahutay ug mosulong, ilabi na sa diwa sa kalihukang pagtul-id.