Madinaugong napalayas niadtong Hunyo 2 sa mga residente sa Sityo Green Valley, Barangay Nalus, Kiamba, Sarangani ang mga tropa sa 105th IB nga pila na ka bulan nga nagkampo ug naglunsad og kontra-insurhensiya nga Retooled Community Support Program (RCSP) sa ilang komunidad. Paglapas sa internasyunal nga makitawhanong balaod ang pagkampo sa militar sa sentro sa barangay.

Nagkahiusang milihok ang mga residente ug naghimo og mga lakang aron papahawaon ang mga sundalo. Lakip sa gihimo sa mga residente ang hiniusang pagbiya sa sentro sa barangay aron mopuyo sa ubos nga bahin sa komunidad. Misupak usab sila sa mga mando sa mga sundalo sama sa pagpapalit og mga suplay, pagkabo og tubig, ug uban pa. Kini nga mga kalihukan gikuyogan sa mga lider sa sityo ug pipila ka mga upisyal sa barangay.

Nagsilbing kumander sa 105th IB si Lt. Col. Erikzen Dacoco nga gibutang sa maong posisyon kaniadto lang Pebrero. Ang maong batalyon kapin pa lamang sa tulo ka tuig sukad natukod ubos sa 6th ID niadtong Pebrero 2023.