Sa nangaging mga semana, nataho ang mga paglapas sa tawhanong katungod batok sa mga mag-uuma, mananagat ug kabatan-onang estudyante sa mga elemento sa Armed Forces of the Philippines ug sa lokal nga gubyerno.

Demolisyon. Gikundena sa Pamalakaya-Cavite ang ilegal nga pagguba sa demolition team sa lokal nga gubyerno sa Bacoor City sa mga balay sa mga mananagat sa Barangay Talaba 2 niadtong Hunyo 15. Walay dala nga dokumento ang mga tawo-tawo, kundili “berbal nga mando” lang. Base sa dayalogo sa grupo kang Mayor Strike Revilla niadtong Mayo, hangtud Hulyo pa unta magpabilin ang mga mananagat, ug matagaan og fisherman’s dorm o puy-anan ang mga nag-unang apektado.

Niadtong Hunyo 1, pinugos nga gipapahawa ug giguba sa mga sakop sa Pieceland Corporation ang anaa sa 14 ka nahabiling balay sa mga lumad nga Mangyan-Iraya sa Sityo Malatabako, Barangay San Vicente, Abra de Ilog, Occidental Mindoro. Nahitabo ang insidente human nagdesisyon ang Abra de Ilog Municipal Trial Court niadtong Abril 8 nga sad-an sa kasong “other forms of trespass” ang siyam ka lumad nga Mangyan-Iraya.

Pagdagit ug tortyur. Pinugos nga gidagit sa mga naka-sibilyan nga ahente sa 5th ID si Angel Lopez, konsehal sa UP Diliman University Student Council ug boluntir sa Youth Advocates for Climate Action Philippines niadtong Hunyo 13 samtang nagpahigayon og kampanya sa impormasyon ug edukasyon sa Barangay Kakiduguen, Kasibu, Nueva Vizcaya. Sa kustodiya sa militar, gipailalom siya sa sikolohikal ug emosyonal nga tortyur. Anaa siya sa maong lugar aron motabang sa kampanya para sa mga komunidad nga maapektuhan sa operasyon sa North Luzon Mineral Resources Corporation. Nagkampo ang 86th IB sa barangay hall sa Kakiduguen nga nagtinguha nga pugngan ang pagbatok sa mga residente sa pagmina sa ilahang komunidad.

Militarisasyon. Gikan Hunyo 7 hangtod sa kasamtangan, nakapailalom sa militarisasyon sa 62nd IB ang mga komunidad sa Central Negros. Niadtong Hunyo 8, ilegal nga giutingkay sa militar ang mga kabalayan sa mga sityo sa Punong, Nabakalan, Anahaw, Tribu, Laos, ug Agpapataw nga makit-an sa utlanan sa mga barangay sa Trinidad, Sandayao, ug Binobohan sa Guihulngan City, Negros Oriental. Samtang, nagkampo sab ang pipila ka sundalo sa Agogolo Elementary School sa Barangay Macagahay, Moises Padilla, Negros Occidental nga nagdala og kahadlok ug kahasol sa mga magtutudlo ug estudyante. Grabeng apektado sab niini ang panginabuhian sa mga residente.