Malampusong napahigayon sa grupo sa US nga Freedom Road Socialist Organization (FRSO) ang ilang ika-10 nga Kongreso niadtong Mayo sa kritikal nga panahon diin miuswag ang mga pakigbisog sa katawhan ug paspas nga miunlod sa krisis ang monopolyo kapitalismo sa US. Nagpaabot og pag-abi-abi sa kongreso sa FRSO ang Partido Komunista ng Pilipinas (PKP).

Ang FRSO usa ka nasudnong organisasyon sa mga rebolusyonaryong nakigbisog alang sa sosyalismo sa US. Sumala sa grupo, sukad nga gipahigayon niini ang ulahing kongreso niadtong 2022, nakasinati og ekstra-ordinaryong paglapad ug pagdaghan ang ilang mga myembro sa mga syudad ug lungsod. Nakasalmot sa kongreso ang 185 ka delegado ug 101 ka alternatibong myembro niini, nga maoy kinadaghanan sa mga nangaging kongreso. Gikan sila sa tanang estado sa US. Kadaghanan sa mga delegado wala pay edad 35 ug kapin 40% ang gikan sa mga dinaugdaug nga nasyunalidad. Halos katunga sab sa tibuok kongreso mga babaye ug kabahin sa LGBTQ+.

Sa nangaging mga tuig, napangulohan sa FRSO ang pipila ka mga protesta nga giapilan sa gatusan ka libo nga katawhan ug hingpit nga nahimong usa ka pwersa sa kalihukang masa. Gitaho sa grupo ang pag-uswag sa ilang mga buluhaton sa kalihukang mamumuo, aktibong pagtibuok sa mga nasudnong kalihukan, ug pakighiusa sa mga internasyunal nga pakigbisog sama sa Palestine ug Pilipinas. Naningkamot sab ang tibuok ginsakpan niini nga batukan ang reaksyunaryong mga atake ni Trump. “Niasdang kita sa dalan paingon sa tinguhang magtukod og bag-ong partido komunista nga makahagit sa gahum,” pamahayag sa FRSO.

“Ang inyong panagtigom usa ka importanteng kalampusan alang sa hut-ong mamumuo ug sa tanang gipahimuslan ug dinaogdaog nga katawhan sa kinauyokan sa imperyalistang halinaw,” pamahayag sa PKP. Dugang sa Partido, tukma kaayo ang kongreso ilabi na paspas kaayong nagkagrabe ang mga kontradiksyon sa US ug sa tibuok kalibutan.

“Naglantaw kami sa padayong magkaubang pagkat-on ug pakigbisog, aron kab-oton ang mas daghan pang kalampusan para sa katawhan, ug aron magmartsa nga magkauban sa pagkab-ot sa kagawasan, hustisya, ug mabulukongsosyalistang kaugmaon, ug mas masidlakon pang komunistang ugma,” matud pa sa PKP.