Naballigi nga inangay ti grupo idiay US a Freedom Road Socialist Organization (FRSO) ti maika-10 Konggreso da idi Mayo iti kritikal a panawen a dumurdur-as dagiti dangadang ti umili ken pumaspaspas ti panagsuwek ti krisis ti monopolyo kapitalismo iti US. Nangidanon ti kablaaw iti konggreso ti FRSO ti Communist Party of the Philippines (CPP).

Ti FRSO ket maysa a nailyan nga organisasyon dagiti rebolusyonaryo a makidangdangadang para iti sosyalismo iti US. Segun iti grupo, manipud idi inruswat daytoy ti maudi a konggreso idi 2022 ket napasamak ti ekstra-ordinaryo a panaglawa ken panagado ti kamkameng daytoy kadagiti syudad ken ili. Nagkakadwa iti konggreso ti 185 delegado ken 101 alternatibo a kameng daytoy, a kaadwan kadagiti napalabas a konggreso. Naggapu da amin iti estado ti US. Dakkel a mayorya dagiti delegado ket ub-ubing iti edad a 35 ken nasurok 40% ket nagtaud kadagiti maidadanes a nasyunalidad. Dandani kagudwa met ti intero a konggreso ket babbai ken paset ti LGBTQ+.

Kadagiti napalabas a tawen, naidaulwan ti FRSO dagiti sumagmamano a protesta a dinar-ayan ti ginasut a ribo nga umili ken naan-anay a nagbalin a maysa a pwersa iti tignay masa. Inyulat ti grupo ti panagdur-as kadagiti trabaho iti tignay tegged, aktibo a panangbukel kadagiti nailyan a tignay ken pannakikaykaysa kadagiti internasyunal a dangadang kas iti Palestine ken Pilipinas. Inkagumaan met ti intero a kamkameng daytoy a labanan dagiti reaksyunaryo nga atake ni Trump. “Umab-abante tayo iti dana agturong iti panggep ti panangbukel ti baro a partido komunista a mangkarit iti turay,” pablaak ti FRSO.

Ti taripnong yo ket maysa a napateg a balligi para iti dasig a mangmangged ken amin a magungundawayan ken maidadanes nga umili iti puseg ti imperyalista a halimaw,” pablaak ti CPP. Nayon ti Partido, napapanawen la unay ti konggreso nangruna ta nakaparpardas nga umir-irteng dagiti kontradiskyon iti US ken intero a lubong.

“Nakatannawag kami iti agtultuloy a sangsangkamaysa a panagadal ken pannakidangadang, tapno danunen ti ad-adda pay a balligi para iti umili, ken tapno agkadwa nga agmartsa iti pananggun-od iti wayawaya, hustisya ken nalawag a sosyalista a masakbayan, ken ad-adda a naranranyag a komunista a masakbayan,” segun iti CPP.