Nasurok 100 aldaw manipud idi Pebrero 28 idi rinugyan ti imperyalismo a US ken Zionista nga estado ti Israel ti panagraut ken mano a lawas a panagbomba iti pagilyan nga Iran, pinirmaan ti dua a pagilyan idi Hunyo 17 ti memorandum of understanding wenno “panagkinaawatan” kalpasan ti narikut a negosasyon idiay Islamabad, Pakistan. Linaon daytoy a panagkinnaawatan ti “ceasefire” iti unos ti 60 aldaw tapno pagsaritaan dagiti detalye ti mabukel a pinal a katulagan.

Daytoy a katulagan ket sinerrek ti US kalpasan a mapaay a pagrukmaen ti Iran tapno isuko ti langis ken soberanya, ket ipasidong daytoy iti diktar na. Iti laksid ti ad-adda a superyor a pigsa’t militar ken maulit-ulit a deklarasyon ti balligi ti mauyong a presidente daytoy, napwersa ti US a temporaryo nga iyatras ti agresyon iti Iran, iti sango ti nauneg a pangpulitika a rekka iti agar-ari a dasig ti US, ken napigsa a riri dagiti umili iti agtultuloy a tumaytayok a presyo ti langis.

Ti katulagan ket pammaneknek met iti kabaelan ti maysa a basbassit ken nakapkapsut a pagilyan nga addaan soberanya, a salakniban ti panagwaywayas na laban iti ad-adda a nabileg nga imperyalista. Iti laksid ti naranggas a panagbombomba ti US ken Israel, agtaltalinaed a determinado ti Iran nga ilaban ti panagwaywayas na. Kaniwas iti tagtagainep ni Trump ken Netanyahu a rumukwas ti umili laban iti gubyerno da, nagkaykaysa ti intero nga Iran iti sidong ti bandera ti nailyan a panagdepensa. Minilyon ti nagtitipon kadagiti kalsada tapno aggigiddan a babalawen ti panagikuspil kadakwada ti imperyalismo a US.

Uray napirmaan, agtaltalinaed a mapagdudwaan ti katulagan. Agtultuloy ti panagprobokar ken pablaak ni Trump nga “agsubli iti gera” ken “tennagan ti bomba dagiti ulo da” nu saan na a maala ti kayat na iti katulagan. Saan latta a maanawa ti panagbomba ken panangagaw ti Israel iti teritoryo ti Lebanon. Agtaltalinaed a nasurok-kumurang a 20 base militar daytoy idiay Kuwait, Qatar, Bahrain, United Arab Emirates (UAE), Saudi Arabia, Oman ken Iraq iti aglikmot ti Iran.

Bayat a temporaryo nga inpreno ti US ti agresyon iti Iran, itultuloy na met a pakpakarwen ti pannakibiang daytoy iti Latin America. Kalpasan a rauten na ti Venezuela ken dukuten ti presidente daytoy a ni Nicolas Maduro ken ti asawa na a ni Cilia Flores, saan nga agressat ti panangitalmeg daytoy iti gubyerno ti Venezuela tapno sumurot kadagiti diktar ti US ken agserbi iti interes ti dadakkel a kapitalista nga Amerikano, nangruna ti dadakkel a kumpanya ti langis.

Ar-aramaten daytoy ti iskema a “gera kontra narkotiko” tapno ikalintegan ti pannakibiang ken panagpangta iti Mexico, Colombia, Guatemala ken dadduma pay a pagilyan. Agtultuloy ti panagbomba daytoy kadagiti babassit a lugan a pangbaybay iti Caribbean, uray awan pruweba a sangkot dagidiay iti droga. Agtultuloy ti panagliplipit ken panagpangpangta daytoy iti pagilyan a Cuba tapno ipaikkat ti kontrol iti panagplano ti estado iti ekonomya, ken luktan daytoy iti panagserrek ti gangannaet a dadakkel a bangko ken kapitalista. Probprobokaren daytoy ti gubyerno iti Bolivia a pasardengen dagiti mano a lawasen a martsa ken panagrukwas ti minilyon nga anakling-et iti aso-aso a gubyerno ken plano ti panagisuko kadagiti rekurso ti pagilyan iti US. Direkta daytoy a makibibiang tapno ipangabak ti maka-US a kandidato daytoy iti Colombia.

Agtultuloy ti US iti panagipwesto ti mano pulo a ribo a tropa, dagiti armas ken ramit a panggubat ken pwersa a nabal iti Pilipinas, idiay Japan, South Korea ken dadduma pay a pagilyan iti Asia,tapno “palikmutan” ken “pawilan ti panagpigsa” ti China. Sugsugsogan ken supsuportaran daytoy ti Japan iti panagbaw-ing iti militarismo ken panagtallikod iti kontra-gera a konstitusyon, a sinabat ti nalawa a protesta ti umili. Sugsugsogan na met ti Taiwan nga agpapigsa ti militar ken agsagana “laban iti agresyon.”

Tuluy-tuloy a pappapigsaen ti US ti kontrol ken dominasyon daytoy iti Pilipinas. Agsasaruno ken agraragpin dagiti ehersisyo a militar saan laengen iti amyanan a Luzon, nu di ket agingga idiay Visayas ken Mindanao. Iyar-aramid daytoy ti AFP, iti duron ti US, ti inawagan da a “territorial defense exercises” nga ehersisyo militar iti nadumaduma nga isla, tapno kaluban ti panagensayo ti maniobra dagiti tropa nga Amerikano iti intero a pagilyan. Rugrugyan ti US nga itakder ti imbakan ti langis (fuel depot) iti Davao Gulf, ken dagiti pasilidad idiay Cebu ken Cagayan de Oro para iti panagtarimaan wenno pagsangladan dagiti barko a nabal daytoy.

Iti linged ti Salaknib Exercises, Kasangga ken dagiti kapada dagitoy, makibibiang ti militar ti US kadagiti operasyon a kontra-gerilya iti pagilyan, iti langa ti panagsanay, panagpondo ken panangarmas iti AFP iti gera laban iti New People’s Army. Idiay Camarines Sur, nakita dagiti tropa nga Amerikano ken Australian a kabilang kadagiti operasyon ti AFP laban iti masa a mannalon kadagiti baryo.

Napinget nga idurduron ti US ti panangitakder idiay Central Luzon ti 1,200-ektarya nga “economic security zone” iti balangkas ti Pax Silica. Paset daytoy ti iskema ti US nga agawen ti eksklusibo a kontrol kadagiti kangrunaan a pagtataudan dagiti krusyal a mineral para iti produksyon ti teknolohiya a kasapulan para iti armas a panggubat.

Iti sango ti agtultuloy nga agresyon militar ken pang-ekonomya ti imperyalismo a US, rumbeng a tuluy-tuloy a papigsaen ken palawaen ti panagkaykaysa ti umili a Pilipino, tapno irupir ti panagwaywayas ti pagilyan ken supyaten ti panangguyod daytoy iti Pilipinas kadagiti gera a ganggangtan ti US. Kasapulan a babalawen ken labanan ti aso-aso a rehimen Marcos, nangruna dagiti upisyal daytoy iti militar ken depensa nga ahente ti imperyalismo a US ken numero uno a traydor iti umili. Isuda ket bulsek a paspasurot kadagiti diktar ti amo da nga Amerikano ken kasabwat iti panagari-ari dagiti pwersa a militar ti US iti Pilipinas, a pakadangran ti pagbiagan ken kinatalged ti umili, ken wayawaya ti pagilyan.

Agtultuloy a papigsaen dagiti dangadang ti masa iti dumakdakkel a presensya a militar ti US iti Pilipinas. Papigsaen ti tignay edukasyon, propaganda ken pangkultura tapno riingen ti umili a Pilipino, nga agtultuloy a mabulbulsek iti kinapudno ti panagari ken panangidadanes ti imperyalismo a US iti pagilyan. Palawaen dagiti tignay ti umili laban kadagiti base ken pasilidad militar ti US, dagiti saan a patas a katulagan militar, dagiti ensayo a panggera, presensya dagiti tropa nga Amerikano ken nakaimbak a ramit militar ti US iti pagilyan.

Kasapulan a papigsaen ti rekrutment ti New People’s Army kas kangrunaan nga armas ti umili a Pilipino iti pananglaban iti panangidadanes ti imperyalismo a US iti pagilyan. Kas ti inpakita ti pakasaritaan, ti pudno a nailyan a wayawaya ket magun-od iti dana ti armado a rebolusyon. Bayat a saan a pudno a makalislisi ti Pilipinas iti sippayot ti imperyalista a US, ti umili a Pilipino ket agtultuloy iti armado a panagrukwas tapno gun-oden ti tartarigagayan a wayawaya ti pagilyan.