Agsaruno a taktikal nga opensiba ti insayangkat dagiti yunit ti New People’s Army (NPA) iti Negros Island idi Hunyo 12 ken 14. Maysa nga aktibo a depensa met ti naisayangkat idiay Northern Samar.

Idi Hunyo 14, inambus ti NPA-Northern Negros (Roselyn Jean Pelle Command) ti tropa ti Regional Mobile Force Battalion-Negros Island Region nga agisaysayangkat ti kontra-insurhensya nga operasyon iti Sityo Alimpolosan, Barangay Lalong, Calatrava, Negros Occidental. Insardeng dagiti Nalabbaga a mannakigubat ti panagpaputok idi mapaliiw da nga adda dagiti sibilyan a kadwa dagiti pulis. Saan nga intuloy dagiti Nalabbaga a mannakigubat ti panagdarup tapno masigurado ti kinatalged dagitoy.

Ti naambus a yunit ket adda iti erya tapno ituloy ti Retooled Community Support Program (RCSP) nga inrugi ti 79th IB. Ti RCSP ket maysa a pammarang a programa ken panglinged tapno ad-adda a pakarwen ti militarisasyon iti kaaw-awayan.

Idi Hunyo 12, nabulabog dagiti soldado ti 62nd IB iti detatsment iti Barangay Sikatuna, Isabela, Negros Occidental iti naisayangkat nga operasyon a haras ti NPA-Central Negros (Leonardo Panaligan Command). Maysa a pasista a soldado ti napatay ken maysa ti nasugatan iti armado nga aksyon.

Idiay Northern Samar, nagisayangkat ti armado nga aksyon ti NPA-Northern Samar (Rodante Urtal Command) laban iti 20th IB iti Barangay Catotoogan, Las Navas idi Hunyo 4 ti malem. Umuna a nakaputok ken aktibo a nakadepensa ti Nalabbaga a hukbo laban kadagiti agop-operasyon a soldado. Innem a tropa ti 20th IB ti napatay ken adu pay ti nasugatan. Iti ospital, dua pay ti natay met laeng.